Налогла тёлеуде къаллай тюрлениуле сакълайдыла

Бир-бир тыш къыралла Россейге санкцияла салгъанлары ючюн РФ-ни Правительствосу бизнесни эмда гражданланы сейирлерин къоруулар хыйсап бла талай оноула этгенди. Тийишли законланы проектлери Къырал Думагъа (http://government.ru/news/44699/) жиберилгендиле.

Аладан биринде гитче эмда орта бизнесге план бла тинтиулени бардырыргъа чек салыу оноуну Правительствогъа берирге кереклисини юсюнден айтылады. Анда дагъыда информациялы технологияла сферада къармашхан, кеслеринде да къырал аккредитация болгъан компанияланы ишлерин тинтиуню 2024 жылны ахырына дери тыяргъа дейдиле.

Правительствогъа лицензияла эмда башха эркинликле бериу жаны бла жорукъла бла байламлы оноула этерге эркинлик бериледи. Сёз ючюн, бизнесге лицензияны неда эркинлик къагъытны болжалын созмай ишлерге онг берилирге боллукъду. Аланы алама дегенлеге уа къырал пошлинаны эмда башха жумушланы багъаларын тёлемей алай. Болжалсыз лицензиялагъа бла эркинликлеге келишиу жумушланы тындырмазгъа, квалификациялы экзаменни бермезге, квалификациялы аттестатланы болжалларын созмазгъа да боллукъду.

Бизнесге кредит каникулла

Россейни гражданларына, гитче эмда орта предпринимательство субъектлеге быйыл кредит каникулла алыргъа онг берилликди. Ол санда ипотекалары болгъанлагъа да.

Законну проектине кёре ала быйыл 30 сентябрьге дери кредит алгъан жерлерине барып, аны тёлеуню тюрлендиригиз дерге эркиндиле. Сёз мында быйыл 1 мартха неда тийишли закон кюч алгъынчы дери кредит келишимге къол салгъанланы юсюнден барады. Излемле уа быллайдыла: кредитни ёлчеми РФ-ни Правительствосу белгилеген ёлчемден уллу болмасын, ахчаны алгъан адам банкга аллай тилек бла баргъанда, ары дери бир ай алгъа аны къолайлыгъы ючден бирине тюшюп болургъа керекди эмда ол кезиуде анга аллай льгота амал берилмей турургъа тийишлиди.

Дарманланы багъалары

Эм керекли дарманланы багъаларыны мардасын тохташдыргъанда, РФ-ни Правительствосу тыш къыралланы ахчаларыны багъалары тюрлене баргъанын эсге аллыкъды.

Шёндюгю законодательствогъа кёре быллай багъала «социал неда экономикалы белгилеге кёре тохташдырыладыла». Жангы законда уа ары тыш къыралланы ахчаларыны багъаларын къошаргъа дейдиле. Андан сора да медицина организацияла дарманланы, тюрлю-тюрлю затланы эмда материалланы женгил халда сатып алыргъа боллукъдула. Социал страхование этген Фондха уа реабилитация ишледе хайырланылгъан техника средстволаны эмда жумушланы жаланда бир сатыучудан алыргъа онг берилликди.

Жаланда бир сатыучудан дарманланы эмда медицина материалланы бизни къыралда чыгъарылмагъан тюрлюлерин сатып алыргъа боллукъду. Кеси да ол сатыучу Россейге санкцияла салмагъан къыралдан эсе алай.

Энтта да бир оноугъа кёре саусузну багъыуда изленнген, кеслери да врачланы комиссиясыны оноуу бла жазылгъан дарманланы багъасыны мардасы бир миллиондан 1,5 миллион сомгъа дери кётюрюледи. Мында да сёз жаланда бир сатыучудан сатып алыныргъа боллукъ дарманланы юсюнден барады.

Ахчаны амнистиясы

Къырал Думагъа жиберилген энтта да бир законну проектинде капиталланы амнистиясыны юсюнден айтылады. Сёз мында мюлкюню неда банклада счётланы декларациясын кеси эркинлиги бла этиуню юсюнден барады. Аны бла гражданланы ырысхыларын право жаны бла къорууларгъа амал боллукъду.

Аны бла бирге Уголовный, Налог эмда административ бузукълукъланы юсюнден Кодекслеге да тюрлениуле кийирилликдиле. Сёз ючюн, капиталланы амнистиясына къатышханланы быйыл биринчи январьгъа дери этген бузукълукълары ючюн уголовный жууапха тартмазгъа дейдиле. Бир талай административ бузукълукъла ючюн да иш алай болурун белгилейдиле.

Налог кодексге тюрлениуле

Правительстволу законопроект бла РФ-ни Налог кодексине да тюрлениуле кийирилликдиле. Документде айтылгъаннга кёре, Правительствогъа быйыл налогла эмда тёлеуле сфералада норматив актла чыгъарыргъа эркинлик бериледи. Сёз ючюн, сау жылны ичинде налог контрольну бардырыуну, налогланы, страховой эмда башха тёлеулени бериуню тыяргъа, кетерирге неда башха заманнга кёчюрюрге.