Законла инсанны сейирлерин сакълаугъа бурулупдула

Аналыкъ капиталгъа индексация этилгенди, борчлары болгъанланы файдалары сакъланырыкъды, жашау журт сатып алгъанда эркинликле жалчытылынырыкъдыла.   Февральда кючюне энтта башха законла да киредиле. Аланы сизге ангылатыргъа сюебиз.

 Аналыкъ капитал

Быйылдан башлап бу къырал себеплик инфляцияны ёлчемине кёре кёбейтилликди, алгъын а прогноз тарихле тергелгендиле. Быйыл ол 8,4 процентге ёсдюрюледи. Алай бла юйюрде биринчи сабий туугъанда 524,5 минг сом, экинчисине уа 693,1 минг сом берилликди.

Бу къырал болушлукъ юйюрлеге артыкъда магъаналы болгъанын айтырчады. Ол ишлеп башлагъан кезиуден бери (2007 жылда 1 январьдан) Россейде 11,6 миллион сертификат берилгенди. Быйыл да аны миллион юйюр аллыгъы белгиленеди.

Социал тёлеуле

Февральда кючюне кирген законла инсанны сейирлерин сакълаугъа бурулупдула. Алагъа кёре, адамны борчу болуп, анга приставла терслеу бегим ачып, ахчаны алгъан кезиуде, файданы къыралда инсаннга жашау этерге жетерик ёлчемине тиерге эркин тюйюлдюле. Инсанла борчну къайсы счётдан тешерге жарамагъанын  белгили этерге боллукъдула.

    Аллай бла закон къыйын жашау болумгъа тюшгенлени сейирлерин сакълайды. Адам ахчасыз къалып, башын кечидиралмаз болумгъа тюшмезге керекди, деп акъыл этедиле законну авторлары.

Фатарны сатып алгъан кезиуде

 Къырал эм муниципал власть органла жашау журт оюлургъа къоркъуулу, тынгылы жангыртылгъан неда адамланы кёчюрюрге тийишли  мекямланы тизмесине кийирилгенини юсюнден Росреестрге белгили этерге борчлудула. Ызы бла бу шартла жеринден тепдирилмеген объектлени къырал реестрине къошуллукъдула – ЕГРН.

Алай бла уа фатарны сатып алгъан кезиуде инсан юйню болумуну юсюнден толу шартланы билликди. Закон бир жанындан журтну сатыуну, алыуну низамын женгил этеди, башха жанындан а адамланы эркинликлерин сакълайды.

Жангы тазирле

Хауаны ууландырыугъа контрольну бардыргъан система орнатылмагъаны ючюн тазир салынырыкъды. Жууаплы къуллукъчулагъа ол 20-40 минг сомгъа дери жетеди, предприятиялагъа уа – 100-200 минг сом. Тазирни контроль система тийишлисича ишлемесе неда шартла къырал реестрге кемчиликле бла кёргюзтюлселе да  тёлерге тюшерикди.

Пенсия

Февральдан башлап пенсияны страховой бёлюмю кёбейтиледи – пенсиячы ишлемей эсе. Бу жаны бла буйрукъну уа РФ-ни Президенти Владимир Путин берген эди. Алай бла пенсиягъа 8,6 процентге индексация этилликди (инфляцияны ёлчеминден оздуруп).  Январьда индексация жаланда 5,9 процентге этилгени эсге алынып, тёленмей къалгъан ахча февральда къайтарыллыкъды инсанлагъа. Алай бла уа власть органла бу мадарланы тамата тёлюню инфляция ёсгенден, аны бла бирге уа багъалагъа къошулгъандан сакълар мурат бла тамамлайды.

Жашаууну ахырына дери - тюрмеде

 Сабийге артыкълыкъ этген инсан жашаууну ахырына дери тюрмеде тутуллукъду. Законнга тийишлиликде,  бу артыкъда ауур аманлыкъны къайтарып этген неда эки эм андан кёп сабийни ачытхан, бу аманлыкъ бла бирге адамны эркинлигине дагъыда башха ауур бузукълукъла этген инсан сюдню оноуу бла жашаууну ахырына дери тутмакъда тутуллукъду.