Итни къоркъутама деп, тазирге тюшгенди

Черек райондан биреу  инсаны элни ичинде ушкокдан атдыргъаны ючюн административ жууапха тартылгъанды.

Социал  сетьледе Аушигерде эр киши  итлеге от ачханыны юсюнден билдириу басмаланнганды. Тинтиулени бардырып, Черек районну полициячылары ол ишни 29-жыллыкъ аушигерчи этгенн тохташдыргъандыла. Ол айтханнга кёре, быйыл 14 январьда аны  арбазына хауле ит кирип, маллагъа чапханды. Аны къоркъутур мурат бла эр киши ушкокдан бир ненча кере атдыргъанды. Итге хата салынмагъанды. 

 Эр кишиге РФ-ни КоАП-ыны 20.13-чю статьясыны 2-чи кесегине кёре административ иш ачылгъанды. Анга  эркин этилмеген жерде ушкокдан от ачханы ючюн жарашдырыучу судьяны оноуу бла 40 минг сом тазир салыннганды.

 Хыйлалыкъ этгенине ишеклик барды

Быйыл 2 февральда   КъМР-де МВД-ны уголовный розыскыны къуллукъчулары, Санкт-Петербургда коллегалары бла бирге оператив-излеу жумушла бардырып, Май райондан 34-жыллыкъ эр кишини къайда болгъанын ачыкълап тутхандыла.  Алгъын да сюдню оноуу бла жууапха тартылгъан эр киши кредитле бла байламлы хыйлачылыкъ этгенине ишеклик барды (РФ-ни УК-сыны 159.1-чи статьясыны 1-чи кесеги).

Ноутбукланы багъасы асыры семиртилгенди

Право низамны сакълаучула коммерциялы организацияладан бирини таматасына  ол хыйлалыкъ этгенине ишекликде терслеу материалла ачхандыла.

КъМР-де МВД-ны экономика бузукълукълагъа эм коррупциягъа къажау бёлюмюню къуллукъчулары, оператив-излеу жумушла толутуруп,   компьютерле, алагъа программала сатыу бла да кюрешген компанияладан бирини таматасы хыйлалыкъ этгенин тохташдыргъандыла.  

 2019 жылда июльда «КъМР-де билим бериуню айнытыу» къырал программаны чеклеринде къырал ведомстволадан бири терсленнген башчылыкъ этген компания бла компьютерле келтириуню юсюнден келишимни къабыл кёргендиле.   Аны ючюн     организациягъа 30,7 миллион сом бёлюннгенди.

Алай тинтиуледен ачыкъланнганыча, келтирилген ноутбукла  белгиленнген техника излемлеге келишмегендиле. Аланы багъасы 3,4 миллион сомгъа семиртилгенди.

Следствие управление организацияны таматасына РФ-ни УК-сыны 159-чу статьясыны 4-чю кесегине бузукълукъ этгенине ишекликде терслеу материалла ачхандыла. Бу статьягъа кёре терсленнгенни эркинлиги он жылгъа дери сыйырылыргъа боллукъду.

 Биреуню алмаланы урлап сатханды 

Лескен районну полициячылары, 5 тонна алма урлагъанына ишекли болуп, биреуню  тутхандыла. Бузукълукъну юсюнден полициячылагъа 59-жыллыкъ тиширыу билдиргенди. Аны айтханына кёре, юйде адам да болмагъанын  хайырланып, кимле эселе да,  аны атасыны Аргуданда юйюне киргендиле эмда 5,7 тонна алмасын урлагъандыла. Алай бла   171 минг сом къоранч этилгенди.

Право низамны сакълаучула уручулукъ этгенине ишекликде 33-жыллыкъ бир эллилерин тутхандыла. Ол алгъын да сюдню оноуу бла жууапха тартылгъанын айтырчады. Эр киши алмаланы урлагъанына, аланы сатып, ахчаны уа кеси кереклерине къоратханына женгдиргенди.

Аргуданчыгъа РФ-ни УК-сыны 158-чи статьясыны 2-чи кесегине кёре терслеу материалла ачылгъандыла.