"Омикрон" бизге жетгенди. Бармыды андан къутулур амал?

КъМР-ни Саулукъ сакълау министерствосунда Республикада омикрон-штамм бла байламлы болумгъа аталгъан пресс-конференция бардырылгъанды. Журналистлени сорууларына КъМР-ни саулукъ сакълау министри Рустам Калибатов, Роспотребнадзорну КъМР-де Управлениясыны башчысы Жирослан Пагов, КъМР-ни Саулукъ сакълау министерствосуну штатдан тышында баш врачы-инфекционисти Марина Иванова  жууапла бергендиле. 

Бек алгъа омикрон-штамм Къабарты-Малкъарда онбир саусузда ачыкъланнганыны юсюнден билдирилгенди. Министр Рустам Калибатов айтханнга кёре, бу штаммгъа деп алыкъа энчи багъыу жокъду, «дельтадан» ауругъанлагъа  хайырланылгъан онтёртюнчю схема кетерилмегенди. Ол тюрленирикмиди, къаллыкъмыды – жашау кёргюзтюрюкдю. Ковид жангы вирус болгъаны себепли, къайсы дарман жарагъанын бла къалгъанын врачла сынап, къарап, тинтип биледиле. 

«Омикрон» «дельтадан» эсе тёрт-жети кереге терк жайылады. Алай башха штаммладан женгилирек озады. Аны себепли битеу къыраллада ауругъанланы асламысы юйлеринде багъыладыла. «Коронавирусну бу жангы тюрлюсю терк жукъгъаны себепли, халкъны асламысы аурурукъду. Аны эсге алып, биз реанимациялада аппаратураны тинтип, ремонт керекли жерде аны этип чыкъгъанбыз. Бусагъатда сау айгъа жетер чакълы дарманларыбыз да бардыла», - дегенди Калибатов. 

Жангы «толкъун» келсе, врачла жетишмезге боллугъун да айтханды министр. Сёз ючюн, юйлеринде багъылгъанлагъа биринчи кере врач келсе да, артда врачла узакъдан, телемедицина араладан да саусузлагъа не зат этерге керек боллугъун юйретирикдиле, дегенди ол. 

Жирослан Пагов а республикада онеки лабораторияда ПЦР тестле берирге боллугъун билдиргенди.  Ол айтханнга кёре,битеу больницала, терк медицина болушлукъ берген бёлюмле да экспресс-тестле бла толусунлай жалчытылыннгандыла. «Бу жумуш бек магъаналыды, нек дегенде больницагъа омикрон-штамм бла бир адам окъуна тюшсе, андан вирус башхалагъа жугъарыкъды. Америкада ракдан бакъгъан учрежденияда  барысы да ауруп, сау айгъа ишни тохтатыргъа тюшгенди,  операция этиллик адамла окъуна болушлукъсуз къалгъандыла. Аллай затла болмаз ючюн, хар больницагъа тюшген инсаннга экспресс-тест этилликди»,- дегенди Жирослан Пагов. 

Ол билдиргеннге кёре, бусагъатда бизни республикада госпитальлада багъылгъанланы саны  543 адамгъа жетгенди, аладан 70-си реанимациядадыла, ИВЛ-аппаратла уа он адамгъа салыныпдыла. Битеу 710  ундурукъдан 75 проценти толупдула. Алай «омикрон» кенг жайылса, ундурукъланы саны 1070-ге жетдирилликди.

Омикрон-штамм жукъгъан онбир адам бир жерден тюйюлдюле, башха-башха районладандыла. Араларында вакцина этдирген жокъду. 

Инфекционист Марина Иванова дарман салдырыуну магъанасы уллу болгъанын энтта да бир кере эсгертгенди. «Спутник V» жангы штаммдан 75 процентге къоруулагъанын да айтханды. 

-Жангы штамм бла байламлы иги хапар да барды: ёлгенлени саны  азыракъды, жукъгъанланы асламысы женгил халда ауруйдула. Жарсыугъа,  «дельтаны» «толкъунунда» ауругъанлагъа да «омикрон» жугъады, - дегенди министерствону келечиси. 

Ол бизни республикада «коллектив  иммунитет» алыкъа болмагъанын ачыкъ айтханды. Анга жетер ючюн, халкъны 85-90 проценти  дарман салдырыргъа неда, ауруп, антителалары болургъа керекдиле. Къабарты-Малкъарда уа вакцинациядан ётгенле 47 процентни тутадыла. Ол азды. Токъсан процентге жетген къыраллада ёлгенле аз болгъандыла.

Врачла бусагъатда къайда турадыла, деген соруу да берилгенди. Рустам Калибатов айтханнга кёре, алгъа ала санаторийледе эм больницалада къуралгъан общежитледе тургъандыла. Алай дарман салдыргъанларындан сора юйлерине жюрюп башлагъандыла. Болсада бир къаууму биягъы общежитледедиле: юч сменнге ишлеген  госпитальлада кече онекиде сменлерин бошагъанла больницада къаладыла. 

Рустам Калибатов пандемия битеу медицина ишчилеге бек уллу сынау болгъанын чертгенди. Сёз ючюн, эки жыл мындан алгъа фармацевт заводла дарманланы кереклиси чакълы бир чыгъаралмай эдиле. Бусагъатда болум игиге тюрленнгенди. Кислород да барды. Пандемия башланнганда, аны бла да кёп тыйгъыч болгъанды. Алай терк окъуна сегиз тонна сыйыннган орунла алыннган эдиле: бирлери сатылып, башхалары – арендагъа.Бек кёп адам ауругъан кезиуледе жаланда бир кюннге 25-30 тонна кислород къоратылып тургъанды. Битеуда орунлагъа уа 90 тонна сыйынады. 

Жирослан Паговха интернатла бла байламлы соруу берилгенди. Аны айтханына кёре,  аллай жерледе «омикрондан» ауругъанла чыкъсала, ары врачланы жиберирге оноу этилгенди. Къысхасы, бусагъатда хар зат да эсге алынады, сюзюледи. 

Ахырында специалистле энчи чертип айтхандыла: сакълыкъны селейтирге жарамайды, бир  бирден узагъыракъда турургъа, къолланы дайым жууаргъа, къапла да киерге керекди. Юйде да хар затны  таза тутаргъа, сора кюн сайын терезелени ачып, отоулада хауа айланырча этерге тийишлиди.

Байсыланы Марзият.
Поделиться: