«Къысха заманны ичинде округну субъектлерини саулукъ сакълау бёлюмлеринде инфраструктураны хазырларгъа»

КъМР-ни Башчысы Казбек Коков РФ-ни Президентини Север-Кавказ федерал округда толу эркинликли келечиси Юрий Чайка видеоконференция халда бардыргъан кенгешге къатышханды. Анда сёз СКФО-да санитар-эпидемиология болум сюзюлгенди эмда коронавирус ауруугъа къажау мадарла къалай толтурулгъанларына къаралгъанды.

Кенгешге РФ-ни саулукъ сакълау министрини орунбасары Олег Гриднев, РФ-ни Промышленность эмда сатыу-алыу министерствосуну таматасыны биринчи орунбасары Василий Осьмаков, Росздравнадзорну башчысы Анна Самойлова, Роспотребнадзорну таматасыны орунбасары Елена Ежлова, округну субъектлерини башчылары да къатышхандыла.

Округда 18 январьны эсеплерине кёре, COVID-19 жайылып башланнган кезиуден бери 370 минг чакълы адам ауругъанды. Биринчи ноябрьден бери уа аланы саны 79 минг чакълы бирге кёбейгенди, аладан 46 проценти арт айда ауругъанладыла. Бир сутканы ичинде ачыкъланнган саусузланы санына кёре Ставрополь край биринчи тизмедеди – 500 адамдан аслам. Аны ызындан Дагъыстан келеди - 143 адам. Округда коронавирусдан ауругъанланы битеу саны бюгюнлюкде 23,8 мингнге жетипди.

Жыйылыуда айтылгъаныча, Шимал Кавказны регионларында жангы коронавирус инфекция, ол санда «омикрон», жукъгъанланы саны ёсюп барады. Аны бла байламлы Юрий Чайка «къысха заманны ичинде округну субъектлерини саулукъ сакълау бёлюмлеринде инфраструктураны хазырларгъа» буюргъанды.

Казбек Коков, республикада эпидемиология болумну юсюнден билдире, ол тутхучлу болгъанын, госпитальлагъа тюшгенлени саны ёсмегенин чертгенди эмда анга шагъатлыкъ этген шартла да келтиргенди. КъМР-ни Башчысы коронавирусха къажау кюреш селеймегенин да эсгертгенди. Аны буйругъу бла анга деп республикалы бюджетден 53 миллион сом бёлюннгенди. Ол ахчагъа амбулаториялада  багъылгъанлагъа дарманла эмда тест-системала алыннгандыла. «Ауругъанланы не къадар терк ачыкълар ючюн, лабораторияланы битеу кючлери хайырланыллыкъдыла, бир сутканы ичинде беш мингден аслам тест этилирча боллукъду. Ахыр суткада 3 минг чакълы бир лабораториялы тинтиу бардырылгъанды.  Адамла кёп жыйылыучу жерледе, ол санда билим бериу учреждениялада да, хакъсыз экспресс-тестле бадырлыкъ къошакъ пунктла ачыллыкъдыла» ,- дегенди Казбек Коков.

Ол билдиргенича, дарман салдырыу къыстау барады. Вакцинация пунктладан 85-си кюн сайын ишлейдиле, 58 мобиль бригада да къуралгъанды. КъМР-ни Башчысы дагъыда алгъын тохташдырылгъан чек салыу мадарла къалай толтурулгъанларына къаты контроль этиллигин да чертгенди. Сёз 60 жылдан таматаланы эмда эрттегили ауруулары болгъанланы юйлеринден ишлерча амаллагъа кёчюрюуню, дарман салдырмагъанланы ишге къоймауну, кёп адам къатышхан къууанчлагъа, жыйылыулагъа салыннган чекни сакълауну, профилактика амалланы бузмауну юслеринден барады.

Кенгешде биринчи медицина болушлукъ берген бёлюмге къошакъ ахча бла болушууну онглары да сюзюлгендиле. Ол да бошдан тюйюлдю: амбулаториялада багъылгъанланы саны ёсгени бла байламлы анга бютюн кёп къоранчла этерге тюшерикди. Медицина кадрла жетишир ючюн да республиканы медицина факультетлерини бла колледжлерини студентлерин бла ординаторларын да бу ишге къошаргъа белгиленеди. Дагъыда КъМР-ни Саулукъ сакълау министерство жиберип федерал вузлада окъугъанланы да чакъырыр план барды. Битеу да 500 ординаторну бла студентни ишлетирге белгиленеди. Алагъа кёллендириу халда ахча тёленирикди.

КъМР-ни Башчысыны буйругъу бла къоркъуулу жукъгъан аурууланы госпитальларында ишлеген медиклеге къошакъ тёлеуле энтта да жарым жылгъа бардырыллыкъдыла. Ара район больницалада бла  поликлиникалада терк болушлукъ берген машинала бла участковый службала не халда болгъанларына къаралгъанды, алагъа энттада автотранспорт алына турады. Жангы коронавирус аурууну тохташдыргъан эмда андан бакъгъан амбулатор араланы санына къошула барады, КъМР-ни Саулукъ сакълау министерствосуну коронавирус бла байламлы колл-центри бир номер бла (122) ишлеп турады.                                                    

Асланбекланы Хауа.
Поделиться: