Озгъан жылны эсеплерин чыгъаргъандыла эмда келир кезиуге борчла салгъандыла

Бу кюнледе Халкъла аралы черкесс ассоциацияны (МЧА) толтуруучу  комитетини  кезиулю  жыйылыуу  болгъанды. Ол  очный эмда  онлайн амал бла  да бардырылгъанды. Анга   КъМР-ни  Башчысыны Администрациясыны  таматасы  Мухамед Кодзоков, КъМР-ни Башчысыны Администрациясыны алчы кенгешчиси Артём Кажаров, КъМР-ни гражан обществону институтлары бла байламлыкъла жюрютюу эмда миллетлени ишлери жаны бла министрни къуллугъун толтургъан Анзор Курашинов,  районланы, эллени, шахарланы администрацияларыны башчылары да къатышхандыла. 
Тышындан да кёпле келгендиле, аланы араларында Россейни кёп регионларында, Германияда, Израильде, Тюркде, Иорданияда «Адыгэ хасэ» жамауат организацияланы эмда маданият араланы келечилери да бар эдиле.
 Жыйылыуну МЧА-ны таматасы Хаути Сохроков ачханды эм бардыргъанды. Ол  жамауат организация не магъананы тутханын, къаллай ишле тындыргъаны бла келгенлени шагъырей этгенден сора, сахнагъа Мухамед Кодзоков чыкъгъанды. Ол КъМР-ни  Башчысы Казбек Коковну алгъышлау сёзюн окъугъанды. «Исполкомну  жыйылыуу  къыйматлы боллугъуна  эмда   кёп магъаналы  ишлени юсюнден сёз барлыгъына  ишегим жокъду.  МЧА-гъа  келир юч жылда тамамларгъа керек боллукъ жумушланы планын  жарашдырыргъа, аланы толтурууну жолларын излерге эмда  черкеслилени ана тиллерин, маданиятларын, экономикаларын  кётюрюу жаны бла да мадарла этерге тюшерикди»,- дегенди республиканы оноучусу .
Жыйылыуда  ана тилни, маданиятны, илмуну  айнытыуну,  жаш тёлюню патриот ниетледе юйретиуню, жууукъ эмда узакъ тыш къыраллада жашагъан  черкеслилени  бирикдириуню, жер-жерледе «Адыгэ хасэни» власть органла бла бирге келишип ишлеулерини  юсюнден  да сёз баргъанды.   Старейшинала советни жангы къауумун, аны башчысын  да  къурагъандыла. Ол тамамларыкъ ишни да белгилегендиле.
Андан сора да,  Хаути Сохроков  бла  КъМР-де «Адыгэ хасэ» жамауат организацияны таматасы Мухамед Хафицэ  МЧА-ны толтуруучу комитетини 2022-2024 жыллада   ишлерини  планы бла  шагъырейлендиргендиле. 
Конференцияда этген ишлерини юслеринден айтып, КъЧР-ден  Али Асланов, МЧА-ны Краснодар крайда бёлюмюню таматасы Маджид Чачух, Ставрополь крайда Черкес  Маданият араны башчысы Юнус Шебзухов, Арфан Барсик, Аминат Шогенова, Мурат Табишев да сёлешгендиле.
Исполкомну комитетлерини санына жангылары къошулгъандыла, алагъа башчылыкъ этерик адамла  белгиленнгендиле,  кезиулю, жетинчи, жыйылыуу къачан боллугъу да тохташдырылгъанды.

Холаланы Марзият.
Поделиться: