Казбек Коков «Кавказны келир кезиую» регионла аралы клубуну ишине къатышханды

Россейни Президентини СКФО-да толу эркинликли келечиси Юрий Чайка эм округну регионларыны башчылары «Кавказны келир кезиую» деген алчы жаш тёлюню регионла аралы клубуну   ишине къатышхандыла.

«Регионла аралы клуб «Кавказны келир кезиую» деген  билим берген проект Шимал Кавказны университетлерини студентлерини ассоциацияларыны Россейни Президентини СКФО-да толу эркинликли келечисини аппаратыны байламлыкълыгъы эм Президент грантланы фондуну болушлугъу бла бардырылады, деп билдиргендиле республиканы оноучусуну пресс-службасындан.

Башламчылыкъ «Россей - онглары болгъан къыралды» деген платформаны чеклеринде  бардырылгъан конкурслада хорлагъанланы бирикдирирге, регионлада кадрланы сайларгъа, жаш тёлю бла байламлы форумланы бардырыргъа бурулупду.

 «Сиз бардыргъан съездни оноуларына кёре, биз магъаналы проектлени жарашдырылгъан жол карталаны алыргъа боллукъбуз, ала Шимал-Кавказ федерал округну социал-экномика айнытыууна себеплик этерикдиле. Бир жыл ётгенди, сёзсюз, ол азды, болсада мен толу ийнаныпма - биз уллу эм качестволу тюрлениулени аллында тургъаныбызгъа», - деп чертгенди Юрий Чайка клубну ишине къатышханлагъа.

Жыйылыуда айтылгъанына кёре, шёндю Пятигорскде «Машук» билим араны къурулушу бардырыла турады. «Ол араны мурдорунда «Билим» россейли обществону, «Россей-онглары болгъан къыралды» проектни, Роспатриот араны эм башха биригиуле бла байламлыкъда  иги кесек билим берген программала бардырыллыкъдыла. «Машук»  билим ара Шимал-Кавказ федерал округну регионларыны жаш тёлюсюне бир-бирлери бла сёлеширге майдан болургъа керекди. Аны эшиклери Шимал Кавказны къайсы жанын да айнытыугъа бурулгъан жаш тёлю организациялагъа эм проектлеге ачыкъ боллукъду. Биз бек ышанабыз, араны иши Кавказны жаш тёлюсюне бир-бирлери бла тохтаусуз сёлеширге себеплик этеригине,  СКФО-ну ортасында   Пятигорск шахарда», - дегенди Юрий Чайка.

 Субъектлени башчылары клубну келечилерине алада бардырылгъан  кадрла жаны бла программаланы, конкурсланы эм аланы итогларыны  юсюнден айтхандыла.

 Саулукъ сакълауда жангыртыуланы, волонтёрлукъда эм жаш тёлю политика жаны бла бардырылгъан жангы башламчылыкъланы, регионну айнытыу бла байламлы тургъан сорруулада инсан обществону бирикдириуню магъаналылыгъыны юсюнден да айтылгъанды.

КъМР-ни Башчысы Казбек Коков округну жаш тёлюсюн бирикдирирге деп къуралгъан майданны ишине себеплик этгени ючюн, Юрий Чайкагъа ыразылыгъын билдиргенди.   Аны хайырындан жаш адамла, жаш тёлю эм волонтер биригиулени башчылары, кадрла хазырлау бла байламлы конкурслагъа къатышханла къошакъ халда кеслерини билимлерин ёсдюрюрге эм не жаны бла да айныргъа онг тапхандыла.   

 Ушакъны кезиуюнде Казбек Коков  жаш адамланы сорууларына жууапла бергенди эм келир жылда жаш тёлю проектле бла байламлы грантланы ёлчемлери кётюрюллюклерин айтханды.

«Андан сора да, эки уллу проектни бардырыргъа деп турабыз. Биринчиси-Жаш тёлю чыгъармачылыкъны мекямы (Театрланы мекямы), аны майданларына чыгъармачылыкъ коллективлени чакъырлыкъбыз эм аслам халда коворкинг жерле къурарыкъбыз. Экинчиси-«Элбрус» корпоратив университет» деген биригиуню къурау.    

Ол жаш тёлюге билим берген проектлени эм программаланы хайырланыргъа, усталыкъларын ёсдюрюрге, тюрлю-тюрлю бёлюмледе ишлеген специалистлеге тренингле  бардырыргъа  аламат жер боллукъду», -деп чертгенди Къабарты-Малкъарны Башчысы.

Тюбешиуге къатышханла, андан сора да, регионну оноучусуна, лидерни къаллай ышанлары болургъа керекди, деп соргъандыла. Казбек Коков айтханнга кёре, лидер  неда оноучу болама деп, адамны кесини аллай мураты болмаса да жарарыкъды, бек башы - жаш адамны этген ишлеринде бла жумушларында профессионаллыгъы, билими эм адамлагъа сюймеклиги болургъа керекди.