Къабарты-Малкъарны Башчысыны Администрациясыны сайты игилени санында

Бу кюнледе «Прометей-2021» Битеуроссей интернет-саугъагъа тийишли болгъанланы атлары белгили этилгенди. Аланы саугъалау  Пятигорск шахарда ётгенди.  Анга аталгъан къууанчлы жыйылыуда сёлеше, РФ-ни Президентини СКФО-да толу эркинликли келечисини болушлукъчусу Сергей Стариков ол саугъа Кавказгъа къайтханы бек иги болгъанын чертгенди.

-Биз анга къууаннганбыз.  «Прометейге» Кавказда информация агентстволагъа дайым эс буруп тургъаны ючюн, бек ыразыбыз. ТАСС бизни бла байламлыкъ жюрютгенин да  магъаналыгъа санайбыз. Ол  бизге не жаны бла да юлгюлюдю, -дегенди.

Интернет-саугъаны къурау комитетини башчысы Раджаб Мусаев а конкурс 11-чи кере бардырылгъанын, анга саулай Россей къатышханын, алай бир-бирледе башха къыралланы келечилери да къошулгъанларын билдиргенди. «Быйыл битеу да 100 конкурсант болгъанды. Даражалы жюри аладан 28-син сайлагъанды. Алагъа доммакъ суратла берилгендиле»,-деп къошханды ол.

Интернет-саугъагъа «Власть бла къырал» деген номинацияда Къабарты-Малкъар Республиканы Башчысыны Администрациясыны сайты да тийишли болгъанды. Аны алыргъа Пятигорск шахаргъа КъМР-ни цифралы айныуну министри Ислам Ашхотов баргъанды.

Къабарты-Малкъар Республиканы Башчысыны Администрациясыны сайты  жамауат бла дайым байламлы болуп турургъа себепли этеди. Аны хайырындан хар адам да бир жумушну юсюнден билдиргени бла къалмай, къырал органны ишини юсюнден оюмун жазаргъа, аны ишине багъа бичерге боллукъду.

Конкурсха къатышханлагъа багъа берген къауумгъа ТАСС-ни баш директору Сергей Михайлов, АСИ-ни баш директору Светлана Чупшева, юч къатлы олимпиадалы чемпион Бувасар Сайтиев, Къырал Думаны депутаты Елена Бондаренко, Телебериулени миллет ассоциациясыны президенти Эдуард Сагалаев эм башха белгили адамла киргендиле.             

Юсюпланы Галина.
Поделиться: