Къонакъладан – саугъала, къонакъбайладан - кёрмюч

Битеуроссей Халкъ фронтну Къабарты-Малкъарда бёлюмюню келечилери, Къырал Думаны депутаты Виктория Родина бла бирге, Прохладна районда Приближная станицада орналгъан экинчи номерли школ-интернатха баргъандыла. Къонакъла анда да къулакълары осал эшитген сабийлеге саугъала бергендиле. Ол санда кёгетле, канцеляр товарла, солуу органланы къоруулагъан затла, адырла эмда чыгъармачылыкъ ишле бла кюреширге жараулу абериле бар эдиле, деп билдиргендиле ОНФ-дан.

Бу ишни #МыВместе деген акцияны чеклеринде бардыргъандыла. Кесин да сакъатланы Битеудуния кюнюне жоралагъандыла. Тёрели халда ол жыл сайын 3 декабрьде белгилениучюдю.

Сагъынылгъан билим бериу учрежденияда 70 сабий окъуйду. Къонакъла ала бла ушакъ этгендиле, къол бла ишлеген аберилеге эмда суратланы кёрмючюне къарагъандыла.

- Биз сабийле бла сурдопереводчик болушуп ушакъ этгенбиз кёп тюрлю темаланы юсюнден. Аланы тилеклерине эмда оюмларына къулакъ салгъанбыз. Ала бары да хунерлидиле, неге да сейирлери болгъанладыла: бирлери сурат жарашдырыргъа, башхалары тигиуге, ючюнчюлери уа спорт бла кюрешедиле. Къайсыларыны да аллай къылыкъларын айнытыргъа себеплик этерге керекди, - дегенди Виктория Родина.

Ол кеси да саулугъу бла байламлы чекленнген онглары болгъанын айтханды, алай дагъыда художестволу школну, техникумну эмда университетни тауусханды, ызы бла энчи сабий жаш тёлю спорт школда, Олимпия резервни школунда женгил атлетикадан тренер болуп ишлегенди. Виктория Родина сабийлеге кеслерин айнытыу бла тири кюреширге чакъыргъанды.

Халкъ фронтну келечилери сабийлеге аллай саугъаланы бошдан келтиргенлерин белгилегендиле. «Ала къоллары бла абери ишлерча, кеслерин айнытырча дерслери кёпдю, аны себепли биз келтирген затла алагъа хайырлы болуруна ышанабыз», - дегенди ОНФ-ни келечиси Евгений Бакаев.

Бу интернатны ырысхы онглары арт жыллада игиленнгенлерин къонакъла  бирча белгилегендиле эмда устазлагъа бла школчулагъа жетишимле, жангы хорламла да тежегендиле. Ол санда жангыдан къуралгъан «Доброшкола» деген жерде да. Анда саулукъларында чекленнген онглары болгъан сабийлеге кеслерин жангы усталыкълада сынап кёрюрге амал бериледи.

«Доброшкола» кеси да «Билим бериу» деген миллет проектге киреди. Сагъынылгъан школ-интернат а аны кесинде къурагъанланы санына къошулгъанды.

Улбашланы Мурат хазырлагъанды.
Поделиться: