Миллет маданиятха тартылырча, ана тилни сюерча

Кёп болмай Пятигорскну къырал университетинде орус эм ана тилни  «Ана тил! Сен къалай ариуса!»  деген фестивали болгъанды. Анга Къабарты-Малкъар къырал университетде Отарланы Керим  атлы  маданият  араны келечилери да къатышхандыла.

Чыгъарылгъан эсеплеге кёре, «Орус классика ана тилде» деген номинацияда Александр Сергеевич Пушкинни «Евгений  Онегин» романында Онегинни Татьянагъа письмосун орус эмда малкъар тилде  аламат  окъугъаны ючюн  Этчеланы Русалина экинчи жерге тийишли болгъанды.

Жаболаны Лаура уа, «Ёз маданият тилманчлыкъны кюзгюсюнде» номинацияда Мёчюланы Кязимни «Тарыгъыу» назмусун орусча эм тауча  окъуп, ючюнчю болгъанды. 

- Бизни араны баш борчларындан бири жаш тёлюге чыгъармачылыкъ хунерлерин  ачыкъларгъа болушургъады эм миллет маданиятха , ана тилге бла адабиятха  тартылырча этергеди. Быйыл жангы окъуу жылдан башлап  бу жаны бла тири кюрешебиз.  Арт кезиуледе бизге дайым адамла къошула тургъанлары да къууандырады,- дейди  маданият араны таматасы Ахметланы Артур. 

Ол алгъаракълада «Кязимни окъуу» республикалы конкурсда араны  сохталары жетишимли болгъандыла – Жаболаны Лаура биринчи, Мусукланы Алтын  бла Ёзденланы Зулфия уа  экинчи жерге чыкъгъандыла.