Ауушханны асырауда - себеплик

         Россейни Пенсия фондуну регионда бёлюмюнден билдиргенлерине кёре, быйылны 1 февралындан башлап ёлген адамны асыраугъа берилген социал пособияны ёлчеми, кёбейтилип, 6 424 сом болгъанды. Бу ахча ауушхан пенсиячы ишлемеген эсе тёленеди.

         Пособие ёлгенни жууугъуна, официал келечисине неда аны бастырыу бла байламлы къоранчланы боюнуна алгъан адамгъа бериледи. Аны ючюн Пенсия фондха инсан дуниясын алышхандан сора алты айны ичинде барыргъа боллукъду. Заявительни биргесине паспортун, адам ёлгенини юсюнден шагъатлыкъ къагъытны, аны урунуу китабын неда ол ёлюрню аллында бир жерде ишлемегенин ачыкълагъан   башха документлени алыргъа керекди.

Ёлген адамны тёленмей къалгъан ахчасын къалай алыргъа боллукъду

         Россейни Пенсия фондуну регионда бёлюмю ауушхан адамланы пенсиягъа жыйылгъан ахчаларын (аны накопительный кесегине) жууукъларына тёлеу ишни тамамлайды. 2020 жылны биринчи жарымында аллай 152 оноу этилгенди, алагъа кёре 3 миллион 366 минг сом къоратылгъанды. Бу иш Россейни Правительствосуну 711-чи номерли бегимине кёре тохташдырылгъан жорукълагъа тийишлиликде бардырылады.

         Ахча ёлгенни жууукъларына заявление жазгъанларындан сора бериледи. Былайда бир затха эс бурургъа керекди: ёлген ахчасын къайсы фондда тутхан эсе да (къыралныкъы неда коммерциялы) ары барыргъа тийишлиди. Ауушхан накопительный пенсиясын Россейни Пенсия фондунда жыйгъан эсе, аны жууукъларындан келген документле жарым жылны ичинде жыйышдырыладыла, тинтиледиле. Жетинчи айда ахчаны бериуню неда тёлемеуню юсюнден оноу чыгъарылады. Ахлуларыны заявлениялары къабыл кёрюлсе, ахча оноу этилгенден сора экинчи айны 20-чы кюнюнден кеч къалмай бериледи. Ёлгенни жууукълары белгиленнген болжалны ичинде къагъытланы жыйышдырыргъа неда заявленияны жазаргъа жетишмеген эселе, аланы эркинликлери сюдню юсю бла къорууланыргъа боллукъдула.

         Бу тёлеуле, бек алгъа, ауушханны сабийлерине, юйдегилерине, ата-анасына бериледиле. Ала жокъ эселе, эркинлик аппала бла аммалагъа, къарындаш-эгечлеге, туудукълагъа ётеди. Ала заявленияны, къайда жашагъанларына къарамай, Пенсия фондну къайсы управлениясына да жазаргъа боллукъдула.