Жангы фатарлагъа 88 юйюр кёчерикди

Майский шахарда тозурагъан юйледе жашагъан адамлагъа бериллик кёп фатарлы эки журтну къурулушу андан ары барады. Республиканы Правительствосу бла районну администрациясы аны энчи контрольда тутадыла.

Районну башчысы Татьяна Саенко, бу кюнледе объектлеге барып, къурулушну бардыргъан подряд организацияны адамлары бла сёлешгенди, ишлени терклендирирге, кесин да алгъынча тынгылы бардырыргъа чакъыргъанды.

Подрядчикни адамлары 27-фатарлы юйню экинчи этажыны башын жапхандыла, биринчи этажында электрокюч сетьни жарашдыргъандыла, ызы бла къабыргъаларын сюртюп башлагъандыла. Экинчи юйде да биринчи этажны къабыргъаларын къалап бошагъандыла. Энди уа бетон ишле бла кюреше турадыла.

Ишни «КБР-ипотека» ООО бардырады. Аны бу жаны бла сынамы уллуду. Районну администрациясында айтханларына кёре, былтыр ол быллай программаны чеклеринде эки этажлы юй ишлегенди. Шёндю анда сегиз юйюр жашайды.

Саулай айтханда, быйыл Майский шахарда эски журтладан жангы фатарлагъа 88 юйюрню кёчюрюрге умут барды.