Газны багъасын тёлемегенлени приставла жокълагъандыла

«Газпром межрегионгаз Нальчик» компанияны Урван районда бёлюмюню специалистлери, сюд приставла бла бирге Урванда эмда Кахунда рейдле бардыргъандыла. Аланы кезиуюнде 25 абонентни жокълагъандыла. Компаниядан билдиргенлерине кёре, бу адамланы барында да газ ючюн къадар борчлары барды. Аны орталыкъ ёлчеми жюз минг сомдан озады.

Рейдни кезиуюнде алты абонент борчларын толусунлай бергендиле. Къалгъанларыны уа приставла ырысхыларын (110 минг сом багъасына) жазып алгъандыла. Ала сюдню оноуун сансыз этгенледиле эмда берликлерин кезиу-кезиу жабарча келишим этмегенле. Аланы барына да борчларын жабаргъа он кюн берилгенди. Андан сора приставла сагъынылгъан ырысхыларын сатарыкъдыла.

Компанияны башчысы Залим Вороков абонентлеге тёлеу низамдан чыкъмазгъа чакъыргъанды: «Газ бла жалчытыу келишимге бузукълукъ этиу артда къошакъ къоранчла бла къайтады. Биз абонентлеге онг берирге кюрешебиз, ишни тазирлеге жетдирмей. Анга къулакъ салгъанла, берликлерин кезиу-кезиу жабаргъа боллукъдула. Эпидемиология болум осалына кетгенин эсге алып, онлайн-сервисле жарашдыргъанбыз. Аланы хайырын онсегиз минг абонент кёргенди».

Улбашланы Мурат хазырлагъанды.
Поделиться: