«Законну кючю аны толтуруудады» деген жорукъну башчылыкъгъа алып ишлейбиз»

1 ноябрьде сюд приставла профессионал байрамларын белгилейдиле. Сюд приставланы службасы 1865 жылда Александр Патчахны буйругъу бла къуралгъанды. Ма андан бери озгъан заманла бу иш бек магъаналы да, керекли да болгъанын кёргюзтгендиле. Бюгюнлюкде, Россей Федерацияны Указына кёре, сюд приставланы службасы – толтуруучу властьны къырал органыды, Юстиция министерствогъа бойсунады.

«Россей Федерацияда сюдню оноуун толтурургъа бойсундургъан органлада къуллукъ этиуню юсюнден» 2019 жылда 1 октябрьде чыгъарылгъан 328-ФЗ номерли Федерал закон а службагъа право жаны бла жангы даража бергенди. Анга кёре сюд приставлагъа сурам къатыланнганды, аланы социал жаны бла къоруулау да кючленнгенди. Алагъа кёп инсанланы бла организацияланы сейирлери бла байламлы болгъан борчла салыннгандыла.

Сюд приставланы федерал службасыны Къабарты-Малкъар Республикада Управлениясыны ишини юсюнден а аны башчысы Бауаланы Ахмат хапарлагъанды.

- Ахмат Каллетович, управленияны структурасы бла къысха шагъырей этсегиз эди.

- Бюгюнлюкде Россейни Сюд приставларыны Къабарты-Малкъарда Управлениясы аны аппаратындан бла 14 бёлюмден къуралады. Структура бёлюмлерибиз республиканы хар районунда да бардыла.

- Ала барысы да тазирлерин бла алиментлерин тёлемегенледен ол борчларын жыйыу бламы кюрешедиле?

- Бизни андан башха жумушларыбыз да болгъанларын кёпле биле да болмазла. Биз сюдледе тохташдырылгъан низамгъа бузукълукъ этилмези ючюн жууаплыбыз, борчларындан албугъартып айланнганланы, акъылбалыкъ болмагъан сабийлени излеу бла кюрешебиз, къоркъуулу объектлени ишлерин тохтатдырабыз, законсуз къурулушланы ойдурабыз, тюрлю-тюрлю ведомствола бла байламлыкъ жюрютебиз.

Биз законну кючю аны толтуруудады деген жорукъдан таймайбыз. Инсанла бла сёлеширге не заманда да хазырбыз, алагъа ачыкъбыз. Хар тарыгъыугъа къарайбыз. Энчи сайтыбызда службаны оноучуларына приёмгъа жазылыргъа онг барды. Дагъыда энчи телефон номер тохташдырылгъанды: 898662) 42-71-60. Аны бла сёлешгенлени сорууларына жууапла берген къауум да къуралгъанды.

Арт жыллада ишибизге жангы амалла, ол санда цифралы халла, кийириледиле. Ала ведомствону ишин, къырал жумушланы тамамлауну жорукъларын да иги жанына тюрлендиргендиле.

- Не ишде да, бютюн а сизни службагъызда, кадрладан кёп зат къалады. Сиз а сизге ишге келгенлени къалай сайлайсыз?

- Къыйматлы ишни ёзеги тюз сайланнган эмда къуллукълагъа тюз тохташдырылгъан кадрла болгъанына мен ишексизме. Сюд приставланы федерал службасы анда къуллукъ этериклени сайлаугъа жууаплы кёзден къарайды, жер-жерледе органла да ол жорукъдан таймайдыла. Нек дегенде инсанларыбызны законлу сейирлерин къоруулау хар бирибизни ишлеген халыбызгъа кёре болады. Бизден энчи жууаплылыкъ, усталыкъ эмда кюч-къарыуну, заманны да аямау изленнгенлерин биз барыбыз да ангылайбыз.

Хар кандидат сайлауну бир ненча кезиуюнден ётеди: законодательствону бла Россейни къырал тилин къалай билгенине, саулугъуна, чыныгъыулугъуна, тюз акъыллы болгъанына къаралады.
Сюд приставланы службасына Россей Федерацияны 18 жыллары толгъан эмда тийишли бийик билимлери, башында айтхан ышанлары да болгъан хар адам да алыныргъа боллукъду.

- Сизде къуллукъ этгенледен сурам уллу болгъанын айтханса, аланы кеслерине уа къаллай онгла бериледиле?

- Бизде иш хакъны бир ёлчеми тохташдырылыпды, алай ол адамны къаллай бир заманны къуллукъ этгенине, энчи чынына кёре кётюрюле барады, къыйын болумлада ишлерге тюшгенибиз ючюн да къошулады. Андан сора да, жыл сайын баш эмда къошакъ отпуск бериледи, хар адам энчи кийимле бла жалчытылынады, Къара тенгизни боюнунда ведомстволу санаторийде солургъа да онг барды.

Приставла, право низамны сакълаучу органлада къуллукъ этгенлени статусларына тенг болуп, къошакъ социал онгла бла да жалчытылынадыла. Ол санда 10 жылдан сора журт сатып алыргъа неда ишлерге бир кере ахча болушлукъ этиледи. Жыйырма жыл къуллукъ этген а пенсиягъа ишлеген болжалына кёре чыгъаргъа эркинди.  

Урунуу болумлагъа да энчи эс бурабыз: ишчи жерле тынчлыкълы болурларына, оргтехника, байламлыкъланы мадарлары бла тынгылы жалчытылырларына къайгъырабыз. Ала хар адам да кесини къуллукъ борчун чырмаусуз эмда тынгылы толтурур ючюн керекдиле.  

Къуллукъларын бет жарыкълы бардыргъанла майдалла бла саугъаланадыла, «Сюд приставланы федерал службасыны сыйлы ишчиси» деген махтаулу атха, «Бек иги сюд пристав», «Бек иги дознаватель» деген белгилеге тийишли кёрюледиле. Ишчилерибизни кёллендириуню башха мадарлары да бардыла, ол санда ахча  эмда башха багъалы саугъала, ыспас къагъытла бла саугъалау.

- Ушагъыбызны профессионал байрамыгъызны аллында бардырабыз да, ишчи нёгерлеригизге, окъуучуларыбызгъа да не айтыргъа сюесиз?

- Коллегаларымы, службабызны ветеранларын да жюрегимден алгъышлайма, уллу ыспас этгеними да билдиреме.

Къабарты-Малкъарны жамауатына уа былай айтыргъа сюеме: сюд приставланы сизни  сейирлеригизни, праволарыгъызны къоруулагъандан башха муратлары жокъду. Биз инсанларыбызгъа закон тохташырча этерге болушабыз. Управленияны коллективи аны боюнуна салыннган борчланы терк да, тынгылы да толтурур ючюн битеу болгъан онгланы хайырланыргъа хазырды. Шёндюгю законланы алжаусуз толтуруу - республиканы, саулай Россейни да халкъларыны жашауларын игилендириуню къыйматлы амалларындан бири болгъанына бир ишеклигим жокъду.