Тохташдырылгъан буйрукъла, салыннган чекле къалай сакъланнганларына контрольну кючлендириу изленнгенди

КъМР-ни Башчысы Казбек Коков Къабарты-Малкъарда Коронавирус инфекциягъа къажау мадарланы толтуруу эмда аны жайыла барыуун тыйыу жаны бла оператив штабны жыйылыуун видеоконференция халда бардыргъанды.

Ишни башлай, ол республикада эпидемиология болум къыйынды, алай контрольдады, деп эсгертгенди эмда быллай шартла келтиргенди: госпитальлада 1418 саусуз жатады, ундурукъланы саны уа 1590-дыла. Реанимациялада 163 адамгъа багъылады. Кислородну жетишмегени болумну бютюн къыйыннга айландырады.

Регионну оноучусу Россейни Президенти Владимир Путинни буйрукълары бла байламлы къаллай мадарла этилгенлерини юсюнден да билдиргенди. Ол санда 23 октябрьден Къабарты-Малкъарда  школ каникулла башланнгандыла, коллекджле бла вузла узакъдан окъутууну амалына кёчгендиле. 60 жылдан таматала да юйлерине жиберилгендиле, ишлерин узакъдан бардырыр ючюн.

27 октябрьден башлап ашханалада тойланы, къууанчланы бардырыу бир ауукъ заманнга тохтатылады, кёп адам жыйылгъан маданият эмда башха жумушлагъа да чек салынады. Аланы объектлерине жаланда QR-кодла неда ПЦР-тестлени кёргюзтюулери бла жиберликдиле.

Роспотребнадзорну КъМР-де Управлениясыны башчысы Жирослан Пагов коронавирус бла болумну 26 октябрьге белгили болгъан шартлары бла шагъырейлендиргенди. Битеу да 812737 тинтиу бардырылгъанды, ол санда бир сутканы ичинде 2196-сы. Коронавирус 122 адамгъа жукъгъаны ачыкъланнганды. Ауругъанланы саны муну аллында ыйыкъдан эсе 14,4 проценге кёбейгендиле, озгъан айдан эсе уа – 71 процентге.

Баш санитар врач аурууну терк жайыла барыууну сылтауун адамланы чек салыу мадарланы сансыз этгенлеринде - къапла киймегенлеринде, социал узакълыкъны сакъламагъанларында – кёреди. Анга бу шартла да шагъатлыкъ этедиле: бузукълукъла ючюн салыннган тазир 2 миллион сомдан асламны тутады, 21 организацияны иши тохтатылгъанды. «Контрольну кючлендирирге, лаборатория тинтиулени кёбейтирге керекди. Ол ишге контроль-надзор органланы барысын да къатышдырыргъа тийишлиди», - дегенди Жорослан Пагов.

КъМР-ни саулукъ сакълау министри Рустам Калибатов а керек болса, Чегем районну ара больницасында бла Республикалы сабий клиникада да госпитальла ачыллыкъларын билдиргенди. Ол да кислород жетишмегенине жарсыгъанды: бир ай мындан алгъа кислородну бир суткагъа 7 тоннасы къоратылгъан эсе, бусагъатда ол ёлчем 19 тоннадан озгъанды.

Министр билдиргенича, арт эки ыйыкъны ичинде реанимация болушлукъ керек болгъан саусузланы саны 33 процентни тутады, амбулаториялада 5178 адамгъа багъылады. Коронавирусдан ауругъанлагъа медицина болушлукъ бериу бла 350-ден аслам врач, орта эм гитче медперсоналдан да 630 эмда 400 чакълы бир адам кюрешедиле.

Вакцинация бла байламлы халны юсюнден билдире, министр быллай шартла келтиргенди: бюгюнлюкге  194 519 адам вакцинацияны биринчи кезиуюнден ётгенди, 145 119 адам дарманны толусунлай салдыргъанды. Вакцинацияны планы 36,8 процентге толтурулгъанды. Иммунизациядан не къадар кёп адам ётерча этер ючюн мобил бригадала къуралыпдыла, дарман салдырыучу 84 пункт ишлейди, ангылатыу иш бардырылады.

Жыйылыуну ахырында анга къатышханла, коронавирус бла байламлы халны эсге алып, санитар-эпидемиология излемле къалай толтурулгъанларына контроль этиуню кючлендирирге, экспресс-тестлени терк сингдирирге керекди деп, аллай оюмгъа келгендиле.