Бир жанында киши да къалмазча

Озгъан ыйыкъда Россейде Халкъны санын жазыу кампания башланнганды. Бу жол ол алгъыннгыладан иги да башхады эм кёплеге бу жумушну кеслерини телефонларындан окъуна тындырыргъа онг береди.

Ма бу магъаналы ишни къураугъа жораланнганды Элбрус районну администрациясында бу кюнледе бардырылгъан жыйылыу. Анга район администрацияны башчысыны къуллугъун толтургъан Сотталаны Къурман, Къырал статистиканы федерал службасыны Къабарты-Малкъарда бёлюмюню таматасы Аурика Гаштова эмда башха жууаплы специалистле къатышхандыла. Элбрус районну администрациясыны башчысыны къуллугъун толтургъан Сотталаны Къурман, жыйылыуда сёлеше, бу жууаплы ишге халкъ энчи магъана берирге кереклисин чертгенди, бир адамны да эсеплемей жарарыкъ тюйюлдю, деп къошханды.

Онбешинчи ноябрьге дери бардырыллыкъ перепись бла кюрешириклени биргелерине энчи удостоверениялары боллукъду. Аурика Гаштова чертгенича, ала хар нени да жаланда адамланы айтханлары бла  жазарыкъдыла.

- Бир адамдан да бир тюрлю документ излерге эркин тюйюлдюле. Аллай зат болса,  бизге билдириригизни тилейбиз, - дегенди ол.

Халкъны санын жазыу бюллетеньде  битеу да 33 соруу боллукъду. Адам аладан къайсыларына сюйсе да жууапларгъа эркинди. Бу иш бюгюнлюкде телефонлада болгъан Госуслуги къошакъда, МФЦ-да эмда бу жумушну бардыргъанланы болушлукълары бла тамамланады.

Таппасханланы Аминат.
Поделиться: