Чеклениуле кийирилген сагъатда бизнесни къайгъысын эте

«Иш кёллю Россей» жамауат организацияда бу кюнледе бардырылгъан жыйылыуда коронавирус ауруугъа къажау мадарланы, чеклениуле кийирилген кезиуде предпринимательлеге не бла билеклик этерге боллугъуну юсюнден ушакъ баргъанды. Анга саулай къыралдан жюзден артыкъ адам къатышханды, ол санда организацияны Къабарты-Малкъарда бёлюмюню башчысы Юлия Пархоменко да, деп билдиргендиле регионда бёлюмню пресс-службасындан.

Кенгешни ишин ача, «Иш кёллю Россейни» вице-президенти эмда исполкомуну башчысы Нонна Каграманян, организацияны президенти Павел Титов ресторанла эмда гостиницала тутханла, сатыу-алыу бла кюрешгенле эмда фитнес-индустрияда ишлегенле бла тюбешгенин билдиргенди. Ол айтханча, ала бары да бу чеклениулени бирсиледен эсе асламыракъ сынагъанладыла. «Биз регионлада бизнес бла кюрешгенлени оюмларына тынгыларгъа сюебиз. Ауруу жайылып башлагъанда сизге берилген болушлукъдан хайыр болгъанмыды, бюгюнлюкде уа не зат этерге боллукъду? Ол санда къысха кезиуледе, узакъ кезиуледе да», - деп соргъанды коллегаларына Нонна Каграманян. Организацияны Сибирь федерал округда координатору, Къырал Думаны депутаты Виктор Зубарев а бизнес кезиулю чурумладан азыракъ къоранчла бла чыгъарча амал табаргъа чакъыргъанды.

Бирсиле да оюмларын туура этгенлеринден сора, жыйылыугъа къатышханла бир акъылгъа келгендиле. Ол а алайды: шёндюгю болум былтыр жаз башындан башхады, прививкала бла qr-кодла чыкъгъандыла. Бизнесни ишин тыймазча аланы барын да толуракъ хайырланыргъа керекди.

Аны бла бирге предпринимательле контроль органла этерик ишни аланы боюнларына атмазгъа чакъырадыла. Сёз мында алыучу маска киймей келсе тюкеннге тазир салгъан тёрени юсюнден барады. Прививка этген ишчилерини санын 80-ге жетдирирге кереклисине уа бизнесменле угъай демейдиле.

Къырал былтыр берген болушлукъну юсюнден айтханда, предпринимательле аны хайыры иги болгъанын белгилегендиле, алай дагъыда льготаланы тынгылы жарашдырыргъа чакъыргъандыла. Сёз ючюн, ортакъны тёлегенде каникулла бериу дегенде, ол каникулла болургъа керекдиле ансы, тёлеуню арт болжалгъа салыу угъай. Ол программагъа къыралны иелигинде болгъан объектледен сора, муниципал эмда коммерциялы мекямланы да къошаргъа чакъыргъандыла.

Учуз (2%) багъасы бла бериллик кредитлени алыуда чырмаула болгъанын да сагъыннгандыла жыйылыуда. Къалай алай болса да ФОТ 2.0 программаны жангыдан бардырып башларгъа кереклисин делороссла бары да дурус кёргендиле.

Кенгешде бизнесни тинтиуге чек салыуну, налогла ёсе баргъанларыны, кадастр багъаланы тохташдырыуну, кредит каникулланы юслеринден да сёлешгендиле. Материалланы багъалары ёсе баргъан сагъатда къырал контрактланы багъаларын да тюрлендирирге амал болургъа керекди дегендиле, чеклениуле кийирилген кезиуде фитнес-клубланы да жапмазгъа чакъыргъандыла.
Регионланы келечилери сагъынылгъан проблемаланы жер-жерледе къалай тамамлагъанларын билдиргендиле. Жыйылыуда дагъыда властьланы эмда бизнесни арасында къыйматлы байламлыкъла къураргъа кереклисин чертип, чеклениулени кийирирни аллында аланы юсюнден бизнес-жамауат бла оноулашыргъа чакъыргъандыла.

Кенгешде айтылгъан затлагъа кёре предпринимательлени эмда бизнес бла кюрешгенлени оюмларын тийишдирип, Россейни правительствосуна письмо жиберилликди.

Улбашланы Мурат хазырлагъанды.
Поделиться: