Коронавирус ауруугъа къажау жангы мадарла тохташдырыладыла

Эпидемиология хал осалдан-осал бара баргъаны бла байламлы КъМР-ни Башчысы Казбек Коков коронавирус ауруугъа къажау жангы мадарла кийириуню юсюнден указгъа къол салгъанды. Ол 27 октябрьден башлап кючюне киреди.

Документге тийишлиликде, орта кюнден башлап ашханалагъа тойла, къууанчла бардырыргъа эркин этилмейди, кёп адам жыйылыучу оюн, тепсеу жерле да жабыладыла.

Ашханала, театрла, филармонияла, маданият эмда чыгъармачы юйле, ЗАГС-ла (жабыкъ отоулада некях этген заманларында), кинотеатрла бла кинозалла, фитнес-арала бла башха спорт залла, бассейнле, пассажир канат жолла (кюбюрлени хайырланнганда), ариулукъну салонлары, парикмахерскийле, СПА-салонла, массаж отоула, солярийле, хамамла жаланда QR-кодланы эмда ПЦР-тестлени эсеплерин кёргюзтген адамланы жумушларын тындырыргъа боллукъдула.

Андан сора да, QR-кодланы кёргюзтюуню бла тинтиуню жангы жорукълары кийириледиле: аланы адам мекямгъа кирген заманда къагъытда неда электрон халда контроль этиучюлеге кёргюзтедиле. Контроль этиучюле уа аланы сканированияны, жумушланы порталында шартла бла тенглешдириуню амалы бла тинтедиле (бу жорукъла акъылбалыкъ болмагъанлагъа къатылмайдыла)
Россейни Президентини Указы бла 30 октябрьден башлап 7 ноябрьге дери ишчи кюнлеге саналмагъанлары себепли сабий садлада, къошакъ билим берген эмда спорт школлада да ол кезиуге каникулла тохташдырыладыла.

Театрлагъа, филармониялагъа, библиотекалагъа бла музейлеге жаланда QR-кодланы кёргюзтюу эмда къапла кийиу бла кирирге боллукъду. Алагъа сыйыннганланы саны 50 процентге азайтылады.

Алтмыш жылдан атлагъанлагъа, ала ишлемей эселе, бек амалсыз кезиуде болмаса, юйлеринде турургъа кереклиси эсгертиледи. Алай дарман салдыргъанлагъа бла ауруп къутулгъанлагъа  (QR-кодну кёргюзтюу бла), терек бахчаларына, жууукъларын асыраргъа барыр, закон тохташдыргъан эркинликлерин толтурур (ол жумушланы электрон амал бла толтурур онг жокъ эсе),  дарман салдырыр, кир-кипчикни атар ючюн тышына чыкъгъанлагъа аллай тыйгъычла этилмейдиле.

Иш бериучюле, ишчилерине дарман салдырыргъа онг берир ючюн, 60 жылдан таматаланы эмда солуулары, жюреклери, къан тамырлары, эндокринный системалары ауруп къыйналгъанланы (вакцинация этмезча сылтаулары жокъ эселе) юйлерине жиберирге, ала ишчи борчларын узакъдан тамамларча.

Узакъдан ишлерге жибериуню 65 жылдан абаданлагъа деп тохташдырылгъан жорукъланы 60 жыллары толгъанла эм андан абаданла да толтурургъа борчлудула.

Поделиться: