Урлугъуна кёре – тирлик

Быйылгъы кюз жауунлу болгъанына да къарамай, аграрийле кюзлюклени урлукъларын себиу ишни андан ары бардырадыла. Республиканы Эл мюлк министерствосундан билдиргенлерине кёре, быйыл кюзлюкле ёсдюрюллюк сабанланы ёлчеми былтырдан башха боллукъ тюйюлдю – ол 73,2 минг гектарды. Ол санда кюзлюк будай – 57630, арпа – 9036, рапс – 5530 эмда горчица – 1000 гектарны аллыкъдыла.

Россельхозараны Къабарты-Малкъарда бёлюмюню башчысы Хасанби Куржиев айтханыча, саулай республикагъа бу кезиуде 15619 тонна урлукъ керекди. Алай мюлкле уа аны артыгъы бла (21000 тонна) окъуна хазырлагъандыла. «Ведомствону специалистлери 18180 тоннаны лабораториялада тинтгендиле. Ол санда 3,3 минг тоннасын элита урлукъгъа санаргъа тийишлиди.

Къалгъанын а биринчи эмда экинчи тёлюлюге. Саулай айтханда, урлукъланы бары да ГОСТ-ха келишедиле, качестволары, ала берлик тирлик да игидиле дерчады. Бизни регионда себерге жарамазлыкъ бири да жокъду», - дегенди Куржиев.

Кюзлюклени урлукъларын жарашдырыу бла республикада аслам мюлк кюрешгенин туура этгенди Хасанби Гидович. Ол санда была бардыла: «Отбор», «Восход», «Майскагросервис», «Маис», «Юг-Семена», «Дружба», «Малка», «Заря», «Сукан-су», «Черекский Гибрид» эл мюлк предприятияла эмда талай предпринимательле, колхозла, биригиуле.

Бюгюнлюкде республикада кюзлюк будайны Алексеич, Адель, Арсенал, Антонина, Баграт, Безостая 100, Гром, Гурт, Донская Юбилейная, Таня, Тимирязевка 150, Южанка эм Юка сортларыны урлукълары ёсдюрюледиле. Быллай арпаны: Иосиф, Каррера, Рубеж, Сварог, Стратег, кюзлюк рапсны уа - Сармат.