Бет жарыкълы уруннганы бла сый-намыс тапханды

Элмырзаланы Лизаны Элбрус районда кёпле таныйдыла. Бютюнда болушлукъ, таянчакълыкъ керек болгъанланы арасында уа аны билмеген хазна жокъду. Ол Халкъны социал жумушларын жалчытыучу комп­лекс арада уллайгъанлагъа бла сакъатлыкълары болгъанлагъа юйлерине барып къарагъан бёлюмню таматасыды. Кёп болмай а аны бла саулай республика да танышханды – кёп жылланы бет жарыкълы уруннганы ючюн КъМР-ни Башчысыны Указы бла Лиза Магомедовнагъа «Къабарты-Малкъар Республиканы халкъны социал къоруулаууну сыйлы ишчиси» деген ат аталгъанды.

Кеси айтханнга кёре, Лизаны социал ишчи болур умуту болмагъанды. «Мен Терк районну Урожайное элинде туугъанма,–деп хапарлайды ол. – Школну уа Прохладна районну Заречное элинде бошагъанма. Андан Къабарты-Малкъар къырал университетде окъугъанма, ызы бла кесими школумда химиядан устаз болуп ишлегенме».

1988 жылда уа ол, къадары алай къуралып, Тырныауузгъа кёчгенди. Анда аз вольтлу аппаратураны заводунда инженер-технолог болуп ишлегенди. Предприятие жабылгъанда уа, социал ишге киргенди. Алгъа Социал арада специалист болуп ишлегенди, бир жылдан а бёлюмню таматасына салынады. Аны урунуу стажы 35 жылгъа жетеди, социал жаны бла уруннганлы уа 20 жылдан артыкъ болады. 

Лиза башчылыкъ этген бёлюмде жыйырма чакълы бир адам ишлейди. Ала 156 адамгъа къарайдыла.Аладан кёплери уа элледе жашайдыла. Болсада социал ишчиле аланы да жарты къоймайдыла, борчларын бет жарыкълы толтурадыла, кеслери къарагъанладан жаланда ыспас, махтау сёзле эшитедиле. 

Бёлюмню таматасы иш ты­нгылы барыр, коллектив биригип, бир бирни ангылап урунур ючюн къолундан келгенни аямайды. Социал араны башчылары да аны ишине уллу багъа бичедиле. «Ол ишин тынгылы биледи, аны магъаналылы­гъын толу сезип, анга жууаплы кёзден къарайды. Усталыгъын дайым ёсдюргенлей турады, халкъны социал жумушларын толтурууну жангы амалларына эс бурады. Арт кезиуню алсакъ окъуна, Къызыл Жорну россейли биригиуюнде «Биринчи болушлукъ» деген курсладан ётгенди, «Социал жумушланы тындырыуну къурауда оноу этиуню» программасына кёре «Содружество» ООО-да профессионал билимин ёсдюргенди. 

Лиза Магомедовнаны бир энчилиги барды – керек заманда терк мал табып къойгъан. Ол а бизни ишибизде бек магъаналыды», – дейдиле аны юсюнден таматалары. 

Бийик усталыгъы, уллу иш сынамы да болгъанлары себепли, Лиза тюрлю-тюрлю жыллада Нальчикде профессионал усталыкъны республикалы конкурсуна къатышырыкъланы хазырлау бла кюрешгенди, социал ишчилени аттестациялаугъа, «жол картаны» жарашдырыугъа къатышханды, социал ишчилени «Биринчи болушлукъ» курслада окъурларын къурагъанды. 

Ол ишине чыгъармачылыкъ кёзден къарагъаны бла да айырмалыды, кёп огъурлу ишлени башламчысыды. Ол санда «Тёлюлени байламлыкълары», «Кюмюш волонтёр», «Тау хауа» проектлени сингдиргенди, «Биз бир ишни тамамлайбыз» деген тренинг бардыргъанды, Элбрусну этегинде «Ышаргъанынг ючюн къучакъларыкъма» деген флешмоб къурагъанды, «Жашнагъан май» деген акцияны бардыргъанды. Бир ненча жыл мындан алгъа уа Тырныауузда «Соломон» тюкенде «Къолунгдан келе эсе, болуш!» деген социал тапка къуралырча этгенди.

2017 жылда Элбрус районда Халкъны социал жумушларын жалчытыучу комплекс ара кесича учрежденияланы араларында биринчи жерге чыкъгъанды. Ма анда да Лиза Магомедовнаны къыйыны уллуду. Анга аны 2018 жылда «Социал жумушла бла жалчытыучу учрежденияны бек иги ишчиси» деген битеуроссей конкурсну республикалы кесегинде аллай махкемени бёлюмюню бек иги таматасына саналгъаны да шагъатлыкъ этеди.

Лиза Магомедовна жамауат ишден да артха турмайды: халкъны санын жазыугъа къатышханды, айырыу комиссия­ны члени болуп тургъанды, къырал эмда жамауат организацияла, волонтёрла бла да байламлыкъ жрютеди. Аны ишине багъа бичген саугъаларыны кёп болгъанлары да сейир тюйюлдю – ол Урунуу эмда социал къоруулау министерствону, профсоюзланы, КъМР-ни Айырыу комиссиясыны, район администрацияны да сыйлы грамоталары бла саугъаланнганды. Комплекс арадан да кёп кере махтау алгъанды, пенсиячыланы бла тиширыуланы район биригиулерини ыспасларына да тийишли болгъанды. 

Суратда: Элмырзаланы Лиза КъМР-ни Правительствосунда саугъаланнган кезиуде.