Аманлыкъчылыкъны жолун кесерге

Жаш тёлюге жорукъланы юсюнден дерс

МВД-ны Нальчикде бёлюмюню къырал автоинспекциясыны келечилери Къабарты-Малкъарны автомобиль-жол колледжини окъуучулары бла тюбешгендиле. Полициячыла жаш тёлюге жоллада жюрюуде жорукъланы юсюнден дерс бардыргъандыла. Аны башларны аллында окъуучуланы республикада жол-транспорт болумланы статистикасы бла шагъырейлендиргендиле.

Автоинспектор Ёртенланы Валерий видеогъа тюшген ДТП-ланы кёргюзте, керек жеринде аны тохтатып, осал болумгъа не зат келтиргенин жик-жиги бла ангылатханды. Жаяу жюрюгенлени, алайда къаллай уллу кёллюлюк этгенлерини юсюнден да хапарлагъанды. «Жолну бирси жанына пешеходлагъа деп жарашдырылгъан ызла бла ётгенде окъуна сакъ болмай жарамайды», - дегенди полициячы.

Дерсден сора ол студентле бла бирге шахарны орамларына чыгъып, кёрген водительлени жоллада жюрюуде жорукъланы сансыз этмезге, тынчыракъ айланыргъа, сагъынылгъан переходлагъа жете туруп бютюнда сакъ болургъа чакъыргъандыла. Бу ишге къатышханла ахырында жыйылып суратха тюшгендиле.

Сабийлеге сакъ болургъа чакъыргъандыла

Алгъаракъда гитче Чегем чучхурлада бардырылгъан «Хычинни байрамында» къырал автоинспекцияны районда бёлюмюню келечилери да болгъандыла. Миллет юс кийимле кийген тамата тёлю бла бирге ала къонакълагъа машинада къоркъуусузлукъ бел бауланы эмда сабийлени олтуртхан энчи шинтиклени хайырланыргъа кереклисин ангылатхандыла.

Онеки жылы толмагъан сабийни жаланда аллай шинтикге олтуртуп элтирге кереклисин эсгертгендиле полициячыла. Аны кесин да ёсюмюне, ауурлугъуна, жыл санына кёре сайларгъа керекди, дегендиле.

Байрамгъа келгенле автоинспекторланы айтханларын бирча дурус кёргендиле. Акциягъа къатышханла #РебёнокГлавныйПассажир эм #ПристегнисьРоссия жазыулары болгъан плакатланы да къолгъа алып суратха тюшгендиле.

Уручу бек терк тутулгъанды

Бу айны онекинчисинде МВД-ны Нальчикде бёлюмюне 19-жыллыкъ жаш келгенди. Ол билдиргенича, Тарчоков атлы орамда юйледен бирини тюп этажында ремонт этиу бла кюрешеди. Ишчи кюню бошалгъандан сора инструментлерин анда отоуда къойгъанды. Экинчи кюн келгенде уа аланы жеринде тапмагъанды. Айтханына кёре, ала бары да 20 минг сом турадыла.

Оператив-излеу ишни чеклеринде уголовный розыскны келечилери ишеклик туудургъан инсанны тутхандыла. Ол Бахсан районда жашагъан 47-жыллыкъ эр кишиди. Кеси да алгъын сюдге тартыла тургъанды.

Бу адам этгенин айтханды, инструментлени уа, артда сатарма деп, къоншу юйню подвалында букъдургъанын билдиргенди. Алай бла анга Уголовный кодексни 158-чи статьясыны экинчи кесегини «в» пунктуна тийишлиликде уголовный иш ачылгъанды, деп билдиргендиле УМВД-ны пресс-службасындан.