Къошакъ билим бериуге – аслам эс

Кёп болмай Нальчикни 4-чю номерли гимназиясында «Кванториум» сабий технопарк ачылгъанды. Ол бу жол мектепни мурдорунда биринчи ачылады, ары дери уа анга жаланда «Кюн шахарда» жюрюрге онг болгъанды.   

Мында академия классны окъуучулары цифралы технологияланы хайыры бла буруннгу заманланы юсюнден билирча мастер-класс ишлерикди. Ол санда Заюково-3 обалада табылгъан  артефактла бла да шагъырейленирикдиле. Аны чеклеринде Sketchfab приложение бла жер жюзюню белгили музейлеринде аберилеге къараргъа жарарыкъды. high-tech-квантум программа бла уа 3D-принтер бла ишлерге юйренирикдиле – агъачдан тюрлю-тюрлю затла жарашдырлыкъдыла.

«Кванториум» «Билим бериу» эм «Бюгюннгю школ» миллет проектлеге кёре РФ-ны Жарыкъландырыу министерствосуну болушлугъу бла къуралгъанды. Былтыр узакъ элледе жашагъан школчуланы да инженер усталыкъладан билимлерин ёсдюрюрча мобильный технопарк ишлеп башлагъанды.

Магометланы Сулейман.
Поделиться: