Айырмалыла халкъла аралы эришиулеге къатышырыкъдыла

Бу кюнледе  Нальчикде  «Къурулушчу»,   гуманитар-техника, «Призвание», женгил промышленность, автомобиль-жол колледжледе эмда  Къабарты-Малкъар къырал университетде да  «Ворлдкиллс Россия»  союзну  «Жаш профессионалла»  деген  бешинчи  регионла аралы чемпионаты   бардырылгъанды. 

Чемпионат  юч  кюнню баргъанды. Анга  жетмиш сегиз  адам къатышханды. Ала  тюрлю-тюрлю ишчи усталыкълада кеслерини хунерликлерин кёргюзтгендиле. Хар модельерни, сварщикни, агъач устаны, къурулушчуну, аш хазырлаучуну, робототехника бла кюрешгенни, автомобильлеге ремонт этгенни  ишлерине   ючюшер-тёртюшер эксперт къарагъанды.

Конкурсантланы асламысы алагъа берилген борчланы тынгылы толтургъандыла. Ахырында аланы саугъалаугъа жораланып къууанчлы жыйылыу болгъанды. Жаш адамланы алгъышларгъа кёпле келгендиле. КъМР-ни  Жарыкъландырыу, илму эмда жаш тёлюню ишлери жаны бла министри  Анзор  Езаов,   республиканы  урунуу эмда социал къоруулау министри Асанланы Алим,  КъМР-ни физкультура эм спорт министрини  орунбасары   Мурат Хежев да  жюрекден баргъан сёзлерин  онлайн амал бла   билдиргендиле. Ала чемпионатны къурагъанлагъа, анга къатышханлагъа да  ыразылыкъларын айтхандыла. 

«Абилимпикс» миллет  араны башчысы  Игорь Грибанов  а,  келир жыл  май айда Москвада  халкъла аралы   чемпионат бардырыллыгъын билдирип, анга  да  бизни жерлешлерибиз  бютюн тири къатышырыкъларына ышаннганын, аны ючюн а бюгюнден окъуна тынгылы хазырланып башларгъа   кереклисин  айтханды.

Ыразылыгъы болгъан  ким да конкурслагъа, мастер-класслагъа, тюрлю-тюрлю кёрмючлеге, видеоконференциялагъа, конкурсантла къалай ишлегенлерине окъуна да къараргъа  онг тапхандыла. 

Чемпионатда хорлагъанла  майдалла, сертификатла, ахча  бла да саугъаланнгандыла. Аны бардырыргъа болушханлагъа эм спонсорлукъ этгенлеге, волонтёр медиклеге  да уллу ыспас этилгенди. 

Холаланы Марзият.
Поделиться: