Заранлы хансны кетередиле

Россельхознадзорну  Шимал Кавказда   управлениясы Къабарты-Малкъарда карантин  жерлени тинтиу  эм игилендириу  жаны бла дайым  контроль бардырады. Ол санда аслам эс амброзия  ёсген участоклагъа бериледи. Болсада бу жаны бла  жамауатны жанындан болушлукъ этилмей, жаланда ведомствону кючю азды.   

Быйыл август, сентябрь айлада  амброзия чакъгъан кезиуде  Искож, Дубки микрорайонлада  эм Чегемде  жашагъанладан  анга аллергиялары болгъанладан  Россельхознадзорну управлениясына тарыгъыула этилгендиле.  Алада  арбазлада, орамлада, участоклада эм  объектледе амброзия  кенг жайылгъанны, аланы къурутур ючюн   тийишли инстанцияла  бир  мадар этмегенлери айтылады.

Ведомствону келечилери хар шартха  тийишли эс бургъандыла. Аны чеклеринде болумну игилендирирча  шахар администрацияланы башчыларына эсгертиуле  этилгендиле.

Алай бла, жер-жерли власть органла да къатышып, ол ханс ёсген жерледе  тийишли ишлени бардырыргъа  борчлула белгиленнгендиле. Нальчик округ бла  Чегем районну  администрациялары, шахарны Жол мюлк эм игилендириу  департаменти, жерлени иелери да къатышып, фитосанитар болумну игилендирирча мадар этилгенди.

Магометланы Сулейман.
Поделиться: