Жаш адамланы илму ишлерине – бийик багъа

Кёп болмай Къабарты-Малкъарны къырал агрономия университетини студентлери бла «Успех» билим бериу араны  келечилери Петрозаводск шахарда  «Эм иги илму-инновация иш - 2021» деген халкъла аралы илму-излем конкурсха къатышхандыла. Бу жол ала юч проектлерин кёргюзтгендиле.  

Конкурсну ахырында чыгъарылгъан эсеплеге кёре,  жерлешлерибиз биринчи бла экинчи  жерлеге чыгъып  дипломла эм сертификатла  бла саугъаланнгандыла. Аланы ишлери уа жыйымдыкъ басмагъа киргенди.

Алай бла  биринчи  жер  «Семиртгичлени жангы тюрлюлерин нартюхню ёсдюрюуде хайырланыу» ишлери ючюн  «Агрономия» кафедраны магистранты  Астемир Альмов бла «Успех» школну онбиринчи классыны окъуучусу Кантемир Каноковха жетгенди.   «Картофдан бай тирлик алырча  салыннган препаратла»   ишлери  ючюн а «Агрономия» кафедраны аспиранты Азамат Абидов, магистрант Нарсана Бекалдиева, 4-чю курсну студентлери Байтуугъанланы Исмайыл бла  Забакъланы Азамат экинчиле болгъандыла.   «Тарыны ёсдюрюуде технологияланы экономика жаны бла къыйматлыгъы» деген ишлери  ючюн аспирант Индира Хамокова, магистрантла Аскерби Тутов, Алина Хежева эм 4-чю курсну студенти Индира Догова  экинчи жер бла саугъаланнгандыла.

Студентлеге илму-излем ишлерин бардырыргъа болушханлары ючюн  КъМКъАУ-ну ректору Аслан Апажевге бла  жаш илмучулагъа  башчылыкъ этген  профессор Ирина Ханиевагъа да  ыразылыкъ къагъытла  берилгендиле.

Магометланы Сулейман.
Поделиться: