Бек ийнаннган ахчасыз къалыр

Толу болмагъан айны ичинде (сентябрьде) республиканы 16 инсаны кеслерин хыйлачылагъа алдатып, ахчаларын тас этгендиле. Ала ётюрюкчюлеге 5 минг сомдан, 850 минг сомгъа дери «саугъалагъандыла».

Асламында аманлыкъчыла телефон бла сёлешип, банкны къоркъуусуз, неда финанс бёлюмюню келечисиме, деп алдайдыла. Банк картагъыздан ахчаны урлай турадыла, неда ким эсе да сизни атыгъызгъа кредит ала турады деп къоркъутадыла. Анга ийнанып, инсанла  жалгъан банкирле билдирген «къоркъуусуз счётха» ахчаларын ашырадыла. Сомларын телефон номерге, неда башха инсанны картасына ётдюргенлери окъуна ишекли этмейди адамларыбызны. Ыйыкъны ичинде аллай жети кезиу болгъанды. Жаланда бир инсан, анга хыйлачыла сёлешгенлерин ангылап, телефонун ёчюлтюп къойгъанды.

Энтта башха амалны да хайырланадыла аманлыкъчыла. Интернетде учуз багъасы бла товар сатылгъаныны юсюнден билдириуню басмалайдыла. Анга алданып, адам ахчасын ётдюреди. Хыйлачыла уа олсагъат билдириуню да кетерип, тас болуп къаладыла. Айны ичинде аллай эки аманлыкъ этилгенди.

Жарсыугъа, тамата тёлю артыкъда бек ийнанып къаладыла. Аны бла хайырланып, аманлыкъчыла пенсияларына къошакъ ахча тёленирге керекди дейдиле. Неда жууукъ адамыны атындан сёлешгенча этип, ол къыйын болумгъа тюшгенини, къутхарылыр ючюн ахча керек болгъаныны юсюнден айтадыла.  Май райондан тиширыу аллай «ыргъакъгъа» тюшюп, жашына операциягъа 38 минг сомну, нальчикчи уа пенсиясына къошакъны жарашдырыр ючюн 96 минг сомну ашыргъандыла.

Прохладначы тиширыу а дарманла сытып алгъаны ючюн къоранчларыны бир кесегин артха къайтарыргъап  ёкюлге эмда курьерге 262 минг сом тёлегенди. Алай ол къошакъ тёлеусюз, ахчасыз да къалгъанды.

Эм кёп къоранчны ёлчеми уа 850 минг сомгъа жетеди. Республиканы инсаны биржада ойнап, файда алыргъа кюрешгенди. Алай аны орунуна кесини ахчасын тас этгенди. Битеу бу шартла бла байламлы уголовный ишле ачылгъандыла.