Къоранчланы азайтыргъа онг табылгъанды

Кёп болмай «Россети Северный Кавказ» – «Каббалкэнерго» биригиуню таматасыны къуллугъун толтургъан   Резуан Загаштоковну  башчылыгъы бла  ишчи    комиссиясыны кенгеши болгъанды. Анда баш тема быйыл биринчи кварталда биригиу къаллай бир файда тюшюргенине жораланнганды.   

Сагъынылгъан кезиуде  энергетиклени тириликлерини хайырындан  сетьледе токну  тас болууун  22,04 процентге азайтыргъа онг табылгъанды. Ол планда белгиленнгенден   0,15 процентге азыракъ окъунады. Былтыр бу заман бла тенглешдиргенде уа,   0,63 процентге мажалды.

Андан сора да, ахшы жетишимле болдурургъа, арт заманлада   токну эсеплеген «акъыллы» система сингдирилгени эм токну эркинликсиз хайырланнганланы  (эсеплеген приборлары болмагъанланы неда ызлагъа кеслери алларына къошулгъанланы) тинтирча терк-терк рейдле бардырылгъанлары  да себеплик этеди.

Аны чеклеринде быйыл токну урлагъаннганы бла байламлы 33 бузукълукъ  иш ачыкъланнганды. Чыгъарылгъан эсеплеге кёре,  аманлыкъчыла 440,3 киловатт-сагъат урлагъандыла. Ахчагъа  кёчюрюп айтханда,   биригиуге , 3 миллион сомдан асламгъа къоранч салыннганды.

Кенгешде  «Каббалкэнерго» биригиуню экинчи кварталгъа борчлары да  белгиленнгендиле. Ол санда  кёп фатарлы юйледе токну эсеплеген приборланы жангы тюрлюлерин салырча мадар  эм электрокюч бла байламлы тийишли ишле болжалдан кеч къалмай тамамланыры  сюзюлгенди.