Къыйын болумладан сакъланыуну мадарларын сюзгендиле

Баш кюн КъМР-ни Правительствосуну таматасы Мусукланы Алийни башчылыгъы бла РФ-ни МЧС-ини КъМР-де Баш управлениясыны стратегиялы сессиясы ётгенди. Анга битеу министерстволаны бла ведомстволаны башчылары къатышхандыла.

Жыйылгъанланы алларында ведомствону башчысы Михаил Надежин сёлешгенди. Аны доклады 2030 жылгъа дери республиканы тийресинде табийгъат эм техноген халли къыйын болумладан сакъланыу къалай къуралгъанына жораланнганды.

Михаил Владимирович билдиргеннге кёре, къырал политика бюгюнлюкде  халкъны эм объектлени от тюшюуден сакълау жаны бла бютюнда кючлеуге айланыпды. Ол санда норма-праволу базаны да тийишли халгъа келтириу.

Былтыр къутхарыучу къауумлагъа 1746 кере от ёчюлтюрге атланыргъа тюшгенди. Ала 358 адамны ёлюмден къутхаргъандыла. 1310 адам объектледен чыгъарылгъандыла. Ёлгенлени саны 19 болгъанды. 55 адам ачыгъанды. Ол от тюшюуледен тюшген заран 187 миллион сомгъа жетгенди. От ёчюлтюучюле къоруулаялгъан мюлк а 1 миллиард 145 миллион сом чакълы бола кетгенди.

Арт эки жылда от тюшюулени асламы (74,62%) эл мюлкледе бла ачыкъ жерледе болгъандыла. Жашау-журт мекямлада ол кёрюмдю 13 % тутханды. 

-  Бюгюнлюкде регионну от ёчюлтюу-къутхарыу гарнизоннга 50 подразделение киредиле. Алада 1922 адам къуллукъ этедиле. 1 поезд эм 231 техника да барды, - деп билдиргенди докладчы.

Оператив халда болушлукъ тапдырыуну тинтиулери кёргюзтгеннге кёре, арт жыллада от тюшюулеге тебиреу заманны ёлчеми иги да азайгъанды. Ол а службаны иши бийик даражада къуралгъанын ачыкълайды.

Бюгюнлюкде республикада от ёчюлтюуде хайырланырча 3340 тыш суу ызла бардыла. Дагъыда аллай 2478 гидрант орнатыргъа керекди. Болгъанладан да 585-си ишлемейди. Былтырны алып къарагъанда, жангы 100 гидрант салыннганды. 

Регионда ырхы келген кезиуле жууукълашхан къадарда, жер-жерли самоуправленияны органларыны хазырлыкъларына энчи эс бёлюнеди. Бюгюнлюкде 3 уллу гидротехника объектле жаз башы-жай кезиуге хазырдыла. Эллерибизден бла шахарларыбыздан ырхы басаргъа къоркъуу 59-да сакъланады. Къыйын болумладан сакъланыр мурат бла суу жагъаланы бегитиу бла байламлы ишле белгиленипдиле.

Адамлагъа къыйын болумланы юслеринден билдириу система регионда эсгиргенин болгъанын билдиргенди докладчы. Бу болум бла байламлы КъМР-ни Къурулуш министерствосу керек оборудованияны сатып алыу бла байламлы документацияны хазырлай тургъаны да ачыкъланнганды. Аланы республикада 12 жерде орнатыр мурат барды.

Алай бла сессияда белгиленнген борчла бирикдирилип, Къабарты-Малкъарны къыйын болумланы кезиуюнде сакъларча къураллыкъ онгланы мурдору боллукъдула, деп билдиреди РФ-ни МЧС-ни КъМР-де Баш управлениясыны пресс-службасы.