Тыш къыралдан келгенле экзаменле берликдиле

Биринчи майда къабыл этилген регламентге кёре  Къабарты – Малкъар къырал университетде мигрантла комплекс экзамен бераллыкъдыла: анга орус  тил, тарых, обществознание киредиле. Бу экзамен  Россейни илму эм бийик билим бериу министерствосуну оноууна кёре  жаланда университетде алынырыкъды.

Арт заманда мигрантла бла байламлы федерал даражада кёп соруула сюзюлгендиле. Аладан бири: тыш къыралладан келгенле орус тилни билирге керекдиле, ол алагъа жамауатха къошулургъа, бизни деменгили къыралыбызда жашагъан халкъланы культураларын билирге, кеслерини билимлерин да ёсдюрюрге болушурукъду. Алай болса, мигрантла ишлерге келген кезиулеринде колледжлеге, вузлагъа кирип, жангы усталыкълагъа да юйреналлыкъдыла.

Экзаменни жетишимли берген мигрантла сертификатла аллыкъдыла. Быллай тестлени тынгылы бардырыргъа Шимал Кавказ федерал университет болушурукъду.  КъМКЪУ- ну ректоруну къуллугъун толтургъан Юрий Альтудов: «Бусагъатда федерал эм регионал къырал къуллукъчула вузла бла байламлыкъны кючлендиргенлери бек игиди, - дегенди. – Россейни Президенти Владимир Путин бизге   келген ишчи мигрантла къыралыбызны законларын  эм адетлерин – тёрелерин билирге, алагъа кёре жашаргъа кереклисин чертгенди. Ол муратха жетерге мигрантлагъа окъуу юйле болушаллыкъдыла»,-дейди.

КъМКъУ – да сынау ишлени бардырыргъа битеу онгла бардыла. Бюгюнлюкде бизни университет СКФО – да алчы федерал вузладан бириди, шёндю Россейни элли эки субъектинден эм къыркъ беш тыш къыралладан онсегиз минг студентле, аспирантла, ординаторла билим ала турадыла.   Университет РФ – ни эм кючлю жюз университетини санына киреди.