Чеклени тийрелерине барыуну жорукълары

Май байрамла, жай башланнганы бла таулада жолоучулукълагъа чыгъаргъа сюйгенлени саны ёседи. Аны бла байламлы республиканы Курортла эм туризм министерствосу чекчи жерледе турууну жорукъларын эсгертиуню дурус кёргенди.

Былтыр адамланы солууларына чурум болмазча талай ариу жерибиз энчи документ керекли чекчи объектлени санындан чыгъарылгъандыла. Элбрус районда - Хотютау, Хасан къой сюрген жер, Чегет тау, Донгуз-орун кёл, Когутайны тёппелери, Жашил къонакъ юй жер, Башкарин кёл, «Шхельданы ышарыуу» жагъа, Адыр-Суу ауушда муратла айтхан тала бла таш. Чегем районда - Абай-Суу чучхурла, Голубевни эм Донкинни ауушлары, Чегемни гара суулары, Шаурту чыран. Черек районда - Уштулу (гара суула, ышыкъ эм къонакъ юйле), Къара суу бла Чайнашки эм Тютюн суула, Кривосивцек аууш, Гийбаш кёл, Думалагъа жолла. Бызынгы ауузда - Шыкъы, Уллу чыранны Баранкош кёлге дери кесегине, Мижиргичиран, Хрум къол, Дыхтау тау. «Шхельда», «Джантуугъан», «Джайлыкъ», «Уллу-Тау», «Башиль», «Чегем», «Безенги» альпинист лагерьле, «Приэльбрусье» пансионат бла «Эльбрус» юйретиу ара.

  Россейни бла Гюржюню араларында чекни бешкилометрлик кесегинде, алгъада, алайда турургъа эркинлик берген документ изленирикди. Аны чекчи органнга барып неда управленияны электрон почтасына – pu@fsb.ru жазып алыргъа боллукъду. Россейни гражланларына къагъытны 15 ишчи кюнню ичинде хазыр этерикдиле, тыш къыралланы келечилерине уа – 30 ишчи кюнню ичинде, ол почта бла жетерик заманнга бу болжалгъа кирмейди.  

  Чекчи жерлеге барыргъа эркинлик берген документлени алыуну юсюнден бютюн толу информацияны Нальчик шахар, Къабарты орам, 192-чи юйге барып неда 8 (8662) 48 18 57 телефон номерге сёлешип билирге боллукъду.