Жаш адамланы сейирлерине кёре тындырылгъан жумушла

Россей Федерацияны Президенти Владимир Путинни оноуу бла Росмолодёжьну «Жаш адамлагъа регион» деген проектини чеклеринде Къабарты-Малкъар Республикада кёп жумушла тамамлагъан жаш тёлю арала ишленедиле. КъМР-ни Жаш тёлю ишлери жаны бла министерсвосуну себеплиги бла Нальчикде жаш тёлюню айныууна себеплик этген «Молод» ара ишин башлагъанды. Бюгюн аны юсюнден тынгылыракъ айтыргъа излегенбиз.

Араны медиа проектлери эмда муниципал къуралыулада жаш тёлю бла ишлеу эм туризм бёлюмюню башчысы Атмырзаланы Расулну къызы Аминады. Ол анда ишин башлагъынчы да, Жаш тёлюню ишлери жаны бла министерствода ишлегенди, магъаналы проектлени бардырып тургъанды. Ары дери уа жаш тёлюню айныууна себеплик этген «Эльбрусоид» фондда уруннганды. Жаш адамлагъа хайырлы сейир проектле хазырлагъаны себепли, аны кёпле таныйдыла, ыспас этедиле.

«Молод» биригиу ишин энди башлагъаны себепли, жаш адамла аны къаллай жумушла бла кюрешгенин иги билмейдиле. Аны ючюн Амина жамауатны биригиуню иши бла шагъырейлендиреди. Анда жети тюрлю бёлюм къуралгъанды, аланы хар бирини да энчи магъанасы барды, анга кёре сейир проектле да.

Хар келгеннге да жарыкъ тюбейдиле, регистратурада атын, тукъумун, жыл санын жазадыла. Ол алай къайсы сандагъыла кёбюрек келгенин билир ючюн этиледи. Андан ары уа башха-башха бёлюмлени кёрюрге онг болады. Биринчи кабинет «Тири адамланы майданыды», аны бир къабыргъасына битеу кюзгюле салыннгандыла, ол спорт керекле бла да жалчытыныпды. Андан сора да, бек гитче сабийле ойнарча жер да барды. Бери, жангыз студентле угъай, сабийлери болгъан жаш юйюрле да келгенлерин белгилерчады. Ары чыгъармачылыкъ къауумла келип, тепсерге юйренедиле, андан башха заманда уа жаш адамланы спорт бла кюреширге онглары болады.

Фойеде да жаш адамланы сейирлерин къозгъарча кёп зат къуралгъанды. Анда, жумушакъ тапчанлада олтуруп, китапла окъургъа амал барды, дагъыда шахматла, билим ёсдюрген оюнла да. Аланы санында «Таулу мафия» деген оюнну энчи чертирчады. Амина келген таулу сабийлеге аны бла къалай хайырланыргъа кереклисин да ангылатханларын билдиргенди. Дагъыда анда  плейстейшен ойнарча амалла бардыла, алай аны бла иги эсепле кёргюзтген студентлеге бираз заманны хайырланыргъа къоядыла.

Фойени дагъыда республиканы картасы жасайды. Анда бюгюнлюкде къайсы районлада  жаш тёлю арала ишлерин башлагъанларын чыракъчыкъла жанып белгилейдиле. Бюгюнлюкде Нарткъалада бла Къашхатауда арала ачылгъандыла, ишлерин жетишимли бардырадыла.  Быйыл а Элбрус, Лескен, Чегем эм Терк районлада да арала ачыллыкълары жазылыпды. Картаны къатында уа хар араны да къаллай боллугъуну сураты ишленип, проекти кёргюзтюлюнеди. Дагъыда алайда жаш адамла къурагъан «Молод» деген бренд бла кийимле бардыла.

- Биз кёп тюрлю жамауат жумушла бла кюрешебиз. Ол проектлеге уа студентле, волонтёрла да тири къатышадыла. Аны себепли алгъа кесибизден ёрге жанла бергенбиз, ара ачылгъанлы уа, бу бренд бла байламлы кийимле берирге амалыбыз барды. Мындан ары бу брендге ие болгъаныбызны юридический жаны бла бегитип, башхалагъа да сатаргъа умутлубуз. Бу белги бла жаш адамла энчи къаламла, боюнлукъла эм да кёп башха сейир затла да къурайдыла, ала сатылсала, алагъа да себеп боллукъду, - дейди Амина.

Арада дагъыда уллу конференция зал барды. Анда жаш адамланы ахшы жетишимлери бла байламлы тюбешиуле, концертле, саугъалаула  бардырыладыла. Башха биригиулени да аны ортакъгъа алыргъа эркинликлери барды, жаш адамланы айныуларына себеплик этген биригиуле бла да байламлыкъ жюрютюрге хазыр болгъанларын да билдиргенди ушакъ нёгерим.

Мында проектле жарашдырыучу майдан да ишлейди. Анда ноутбукла, башха жангы технологияла бла да хайырланалырча интернет тартылып турады. «Грантла бла байламлы проектле болсала да, мында бардырадыла», - дегенди Амина.  

 Андан сора «Психология жаны бла болушлукъ ара» да ишин бардырады. Специалистле жашауларында къыйын болумлагъа тюшген жаш адамлагъа болушлукъ этедиле. Кесин танытыргъа сюймегенни, аланы телефон номерлерине сёлешип, къайгъысын айтып, болушлукъ табаргъа онгу барды. Ол номерлени уа биригиуню сайтында неда телеграм-каналларында билирге боллукъду. Мындан ары ол араны кенгертип, «юйюрлю» этерге да умутлудула. Нек дегенде аллай болушлукъ керекли жаш юйюрле да асламдыла.

- Психология жаны бла болушлукъ этген ара ишин бардыргъанлы жылдан аслам болады. Ол заманны ичинде адамлагъа себеплик этип, иги жетишимлеге жетгенлерин да энчи белгилерчады, - дейди Амина ушагъыбызны чегинде.

Дагъыда анда «Чыгъармачылыкъ майдан» да ишлейди. Анда музыка инструментледе согъаргъа юйренирге сюйгенлеге дауурбасла, миллет къобуз, къыл къобуз да бардыла, алада согъаргъа юйретген да этедиле. Дагъыда бир сейири уа къошун бла ишлеу майданды. Анда сабийлени саз топуракъдан сейир затла жарашдырыргъа юйретирикдиле. Андан сора да, шёндю белгили технология бла юзмезде суратла ишлерча аппаратла алгъандыла, бираздан ол жаны бла юйретген дерсле да башланырыкъдыла.

Бир бёлюм а «Медиа майданды». Анда кёп сейир, жангы аппаратура барды. Фотостудиясы да ишлейди, суратчыланы анда фотосессияла этерге амаллары барды. Интерактив студияда уа, жангы технологияла бла хайырланып, аламат видеороликле да къураргъа жарайды. Устазла, келип, дерслерине керекли аламат видеола къураялгъанларын да энчи белгилегенди ушакъ нёгерим. Алай бла хар устазны да дерсин сейир халда бардырыча анда видео жарашдырыргъа онгу болгъаны магъаналыды.

Дагъыда, ары келген жаш адамла юй жылыуну сезерча, ашхана да ишлейди. Алайды да бу арада хар жаш адамны сюйюп сакълайдыла. Аланы ары келип, кеслерине нёгерле табып, сейир затлагъа юйренирге амаллары, онглары да барды. Ишчи кюнледе эрттенликде сагъат сегизден, солуу кюнледе уа сагъат онбирден башлап ингирде сегизге дери аны эшиклери къонакълагъа ачыкъдыла.