Ат чаришле ариу миллет тёреледен биридиле

Биринчи майда Нальчик шахарны ипподромунда Жаз башыны эм Урунууну байрамына аталып  чаришле  болгъандыла. Бир минг бла эки жюз метрге, дагъыда эки минг метрге  узакълыкъда арап эм ингилиз къауумланы атла  къайсы онглуракъ болгъанын кёргюзтгендиле. Бусагъатда ат спорт бизни республикада терк айнып барады. Биринчи май 2024 жылны чариш кезиую да башланнган кюннге саналгъанды, къараучуланы ипподромгъа жыйылгъанлары халкъны бу эришиулеге сейирлери болгъанына шагъатлыкъ этеди.

Бек биринчи КъМР – ни Парламентини саугъасына ючжыллыкъ таза  къумалы  атла чабышхандыла. Битеуда алты эришиуню саугъа фонду эки миллион  беш жюз минг сомгъа жетгенди.

Ат чаришле Кавказны халкъларына тёрелидиле, аны себепли биринчи майда кюн ачыкъ болмагъанлыкъгъа, жюзле бла адамла ипподромгъа жыйылгъандыла. КъМР – ни маданият  ишчилери, аниматорла, сабийлеге аттракционла да байрамгъа энчи къууат бергендиле.

Быйыл ипподромгъа 85 жыл толлукъду, онжети чариш бардырыллыкъды, аладан бири  алтынчы – жетинчи сентябрьде - битеуроссей даражада. «Дерби – 2024» эм «Минги тауну кубогу» деген эришиуледе саугъа фонд элли миллион сом  боллукъду. Ары дери ипподромда кёп ремонт ишле бардырыллыкъдыла, аланы ахча бла КъМР-ни Правительствосу бла Россейни Эл мюлк министерствосу жалчытырыкъдыла.