Эсепле къууандырадыла, этилир жумушла да кёпдюле

Кёп болмай КъМР-ни саулукъ сакълау министри Рустам Калибатов бардырып  Республиканы клиника больницасында (РКБ) ишчи кенгеш болгъанды.  Ол    озгъан жыл  стационарны иши бла байламлы эсеплени чыгъарыугъа жораланнганды.  Анга КъМР-ни Парламентини Председателини орунбасары  Мурат Карданов, борчлу халда медицина страхование этиу фондну бёлюмюню таматасы Рустам Кажаев эм башхала къатышхандыла.

Жыйылыуну ача, Рустам Калибатов саулукъ сакълау уллу эм жууаплы бёлюмледен бирине саналгъанын айта, анга бюгюнлюкде къыралны жанындан  тийишли халда билеклик  этилгенини баш сылтауларындан бири  Президентини Владимир Путинни хайырындан болгъанын да энчи чертгенди. Ол санда бёлюмню айнытыугъа республиканы башчысы Казбек Коков да аслам эс бургъанын, ведомствону башламчылыкъларын къабыл кёргенин да эсге салгъанды. 

  Ол «Саулукъ сакълау» миллет проект бардырылгъанлы  регионлада, ол санда Къабарты-Малкъарда, медицина учрежденияла ишленнгенлерин, тынгылы ремонт этилгенин,  жангы оборудование эм кадрла бла  жалчытылыннганларын да билдиргенди.

Сагъынылгъан шартланы хайыры бла бусагъатда РКБ диагностика эм  реабилитация бардыргъан  бийик технологиялы   оборудование бла жалчытылыннганды.  Ол санда мыйыларында къан иги жюрюмегенлеге болушурча онг табылгъанды.
Эсге сала айстакъ, РКБ регионну кёп профильли эм магъаналы стационарларындан бириди.  Мында саусузлагъа  онсегиз тюрлю ауруудан  багъарча онг барды.  Аны корпусларында бир жолгъа 564 саусуз жатарча жерле къуралгъандыла.  Дагъыда кюндюз стационарында да 30 адамгъа  багъаргъа жарайды. Комплексге 7 корпус, 18 стационар эм 4 параклиника бёлюмле киредиле.

Ишини юсюнден айтханда, былтыр 13 523 инсаннга хирургия болушлукъ тапдырылгъанды. Ол санда аладан 1103-не бийик технологиялы амал хайырланылгъанды. Андан сора да,  687 телемедицина эсгертиу,   15 831 компьютер томография эм  5 698 магнит резонанс томография этилгенди. Жатханланы арасында  ёлгенлени саны  1,9 процентге азайгъанды.

Жыйылыуда больницаны баш врачы Хасанби Тетов терк болушлукъ берген службаны ишлене тургъан корпусуну  юсюнден да толу  хапарлагъанды.

Министр бийик технологиялы медицина болушлукъ берген специалистлени ишлерине уллу багъа бичгенди  эм технологияла жангыра баргъанлары бла дайым билимлерин ёсдюрюрге итиннгенлерине да ыспас этгенди. Сёз ючюн, къан тамырла, травматология,  ортопедия эм саулай хирургия жаны бла багъыуда  жетишимлеге эс бургъанды эм къыйын операцияланы иги кесеги кесибизде этилгенлерин да  белгилегенди.
Ахырында ведомствону таматасы,  къонакъла да чыгъарылгъан эсеплеге бюсюрегенлерин букъдурмагъандыла. Болсада алыкъа  кёп зат  этилирге керегин  эсге салгъандыла эм келир заманда толтурулургъа борчлу проектлени белгилегендиле эм эсгертиуле да бергендиле.