Ток бла ишлеген улоулагъа станцияла ишлерикдиле

Быйыл Къабарты-Малкъарда электрокюч улоуланы ток бла жалчытырыкъ 25 жангы станция ишленирикди, деп билдиргендиле республиканы Промышленность, энергетика эм сатыу-алыу министерствосундан.

Россей Федерацияда быллай станцияла къурау бла байламлы программа бардырылады. Аны чеклеринде субсидияла бериледиле. Бизни республика уа бу иш сынам халда бардырыллыкъ талай регионну санына киреди.

Станцияла къалайда ишленириклери энтта да белгили тюйюлдю. Алай аланы туристле аслам болуучу эмда ток бла ишлеген автомашинала кёбюрек жюрюучю жерледе орнатырыкъдыла. Республиканы оноучулары алгъаракъда инвесторла бла тюбешип, аллай объектле къураргъа себеплик этген къырал программаланы эмда субсидияланы юсюнден айтхандыла.

Эл мюлк производство ёсюм кёргюзтеди

Шимал-Кавказстатны билдириуюне кёре, Къабарты-Малкъарда быйыл январьда 1,9 миллиард сом багъасына эл мюлк продукция чыгъарылгъанды. Озгъан жылны ол кезиую бла тенглешдиргенде,  ёсюм юч процентге жетгенди.

Быйыл январьда тууар эмда тауукъ этден (сау ауурлукъда) 6,9 минг тонна чыгъарылгъанды (0,9 процент ёсюм), 30,4 минг тонна сют (+5,9%) сауулгъанды. Тийишли предприятиялада 12,9 миллион тауукъ жумуртха жыйгъандыла. Бу кёрюмдю уа былтыр январьдан башха болмагъанды.

Къурулуш бёлюмню кёрюмдюлери игидиле

Быйыл январьда къурулуш бёлюмде кёрюмдюлени алып тергегенде, Къабарты-Малкъар Республика саулай Россейде алчы он регионну санына киргенди, деп билдиредиле Росстатдан. Озгъан жылны биринчи айы бла тенглешдиргенде, ол 57,9 процент къошханды. Ахча бла тергегенде, этилген ишлени багъасы 572,4 миллион сомгъа жетгенди. Къыралда кёрюмдюле уа быллайдыла: 10,9 процент эмда 731,9 миллиард сом.

Къурулуш бёлюм экономиканы айныууна бек уллу къошумчулукъ этеди. Жангы ишчи жерле къурау, адамланы жашау болумларын игилендириу жаны бла да магъаналыды ол. Аны себепли Россейни Правительствосу бу сферагъа субсидияла, налог льготала, башха тюрлю амалла бла себеплик этип турады. Тергеулеге кёре бёлюм быйыл да къыралны экономикасына тутхучлукъ этерикди.