Предпринимательликни тасхалары бла шагъырейлендиргенди

Кёп болмай Социал гуманитар (СГИ) эм Менеджмент, туризм эм къонакъбайлыкъ жаны бла  индустрия институтла къурап  Къабарты-Малкъар къырал университетде учаргъа  самокатла бла велосипедле  берген «Юрент»   сервисни къурагъанладан бири  Андрей Азаров бла тюбешиу ётгенди. Анга студентле, преподавательле эм башхала  къатышхандыла.

Жыйылыуну ача, КъМКъУ-ну гуманитар институтуну таматасы  Муслим Тамазов, бюгюнлюкде жангы излемлеге кёре, жашауубуз терк тюрленнгенин,  жангы технологияла сингдирилгенлерин, аны  себепли предприниматель болургъа излеген жаш   тёлю  бу жаны бла  онгланы  иги ойларгъа  кереклерин чертгенди. 

Ол айтханыча, аланы башламчылыкъларында   себеплик этерик  шартладан бирине  бийик билим берген учрежденияланы санаргъа боллукъду.  Вузлада  техника эм илму жаны бла да билимлерин  байыкъландыргъанларындан сора да, чыгъармачылыкъ жаны бла айныргъа эм предпринимательстволукъну игирек аныгыларгъа болушадыла.

- Быллай тюбешиулени  магъанасы - жаш адамланы бир тюрлю иш бла кюрешип башларча таукеллендирирге эм  жетишимли  бизнесмен болургъа юйретиргеди. Эм къыйыны -  бир тюрлю иш башларгъа,  биринчи атламла этергеди. Бу жаны бла жетишимли бизнесменле  юлгю болургъа, амал болуп юйретселе да керекди. Аланы жанындан эсгертиуле  ахшы себеплик этерчадыла. Бюгюн аладан бири  Андрей Азаров бизде къонакъдады,- дегенди Муслим Султанович.

Эсге сала айтсакъ,  «Стартап «Юрент»  кикшеринг бизни жерлешлерибизге кенг белгилиди. Аны   самокатлары КъМКъУ-ну тёгерегинде эм шахарны башха жерлеринде да  аслам  сюеледиле.  Бусагъатда ол къыралда самокатла бла  велосипедлени  учаргъа берген сервиследен эм уллуладан   бирине саналады. Ол Шимал-Кавказ федерал округда  ишлеп башлагъанлы да бир  къауум жыл болады.  Аны продукциясына уллу сурам барды, бютюнда жаш тёлюню арасында.

Аны жетишимлилигини юсюнден айтханда, эм биринчи къаллай бир  файда тюшюргенин билирге сюесе. Сёз ючюн, 2019 жылда  88 миллион сомдан башлап  2023 жылда аны  7 миллирд сомгъа жетдиралгъанды.  

Андрей Азаров биринчи атламла эте тебиреген  предпринимательге   инвесторла,  партнёрла тартынырча не этерге кереклисин ангылатханды. Ол бизнес айнырча аланы магъаналыкъларын  да букъдурмагъанды. Нек дегенде бирде бир тюрлю къыйматлы проектни бардырырча, танг кесек ахча салыргъа тюшеди.

 - Бизге,  хар кимгеча,  биринчи кезиуде бек къыйын болгъанды. Ол кезиуледе неден эм къалай башласакъ иги боллугъун сорурча   сынамы болгъан инсаннга  сорургъа окъуна  онг тапмагъанбыз.  Болсада излеген  бир мадар тапмай къалмайды.  Алай бла  2020 жылда окъуна  бёлюмлерибиз ачылгъан шахарланы беш кереге кёбейтгенбиз эм файдабызны да 60 кереге байыкъландыргъанбыз. 

Бизнесни алтаулан болуп башлагъанбыз. Ол ишибизни тынгылы бардырыргъа  болушады, хар ким кесини жумушун этеди. Конкуренцияны юсюнден айтханда, биз къоркъурча шарт жокъду. Хар ким хунерине, иш кёллюлюгюне кёре жетишимли болады.  

Саулай алып  айтханда,  адам энчи бир зат бла кюрешип башласа игиди. Ол бизнесден ангылауун игилендирирге, айнырча  жангы амалла излерге да итиндирликди.   Кесине ишлеген адам  борчун тийишли халда толтурургъа излейди, андан тышында,  биргесине уруннганлагъа да  жууаплыды.  Ала бары да адамны акъылын, къылыгъын да    тюрлендирмей къоймайдыла. Бусагъатда   предпринимательстволукъ бла кюреширча онгла аз тюйюлдюле. Аны бла бирге къыралны жанындан  билеклик да этиледи.  Сёз ючюн, гитче бизнесни айнытыргъа льготала бериледиле.  Бизнесге итиниулюгю болгъан школда, университетде окъугъан кезиулеринде окъуна бу жаны бла сагъыш этерге, бир тюрлю план хазырларгъа керекди,-деп къошханды  къонакъ.

Ахырында Андрей Азаров  студентлени  сорууларына жууапла берип кёллерин алгъанды эм насийхатлыкъ да этгенди.