Владимир Путинни кандидатурасы ючюн Казбек Коков къол ыз салгъанды

«Россей Федерацияда 2024 жылда боллукъ президент айырыулада Владимир Владимирович Путинни кандидатурасы жанлы болуп къол ызымы салгъанма», - деп билдиргенди КъМР-ни Башчысы кесини телеграм-каналында. 

 «Бизни республикада жашагъанланы асламлары бла бирге президентибизни оноуу жанлы болгъанымы билдиреме. Бюгюнлюкде бизге  тутхучлулукъ эм ышаннгылы айныу керекди. Президентибизни сабырлыгъы, иги сагъыш этген оноулары, политика жаны бла тирилиги, профессионалланы жыйып, аланы бирикдириую - бюгюнлюкде Россейни аллында тургъан чакъырыулагъа къажау сюелирге эмда алгъа барыргъа окъуна онг береди.

Къабарты-Малкъар битеу бёлюмледе айнып барады, россейли регионланы ичинде тийишли жерни алады. Бизде жангы школла, сабий садла, маданият юйле, жолла ишленедиле, элле тапландырыладыла. Кёп миллетли къыралны ичинде жашап, Къабарты-Малкъарны халкъы кесини бурун  заманладан келген маданият хазнасын, адет-тёрелерин эм хоншула бла шуёхлукъда жашау эм къонакъ алыу тёрелерин сакълайды.

Къыраллыгъыбызны жюзжыллыкъ юбилейин да белгилеп, республика алагъа ышаннгылы къарайды. Анда бизни Президентибизни къыйыны да барды, аны акъыллылыгъы эм алгъа къарап сагъыш этгени. Къабарты-Малкъар Владимир Владимирович Путин жанлыды эмда кючлю Россей ючюн!» - деп айтылады билдириуде.