Жангылыкъла

Арт жыллада  Къабарты-Малкъарда солургъа сюйгенлени санына танг къошула барады. Ол себепден турист  маршрутлагъа сурам уллулай къалады.  Чегем чучхурлагъа, Чирик кёллеге, Бызынгыгъа эм  башха жерлеге барыргъа сюйгенле да кёпдюле.  Аны бла байламлы  тау  жолла къоркъуусуз болурча аслам эс бурулады.   Ол санда  «Экинчи Чегем-Булунгу» жолгъа да тынгылы ремонт этиледи. Ишле болжалдан кеч къалмай тамамланырларын республиканы Башчысы дайым контрольда тутады.  

Нальчикде Идаров атлы орамда биринчи номерли автовокзал бу айны ахырында жабыллыкъды. Бу оноу шахарны ичинде орамла транспортдан эркинирек болурча ол хыйсап бла этилгенди.

Былтыр бизни республикада буруннгу жылдан эсе 15 процентге аз жалгъан ахча табылгъанды. РФ-ни Ара Банкыны КъМР-де бёлюмюнден билдиргенлерине кёре, ол санда онтогъузу бирминглик къагъыт ахчала, онжетиси – бешминглик, ючюсю – экиминг сомлукъла эдиле эмда бири уа беш жюз сом эдиле.

Черек районда 2018 жылдан бери 56 тийреде тапландырыу ишле бардырылгъандыла. «Тап шахар болум къурау» проектни чеклеринде 36 арбаз, он майдан, жаяу жюрюгенлеге эки тийре, алты стелла эмда эки эсгертме жангыртылгъандыла. Ишле битеуда онбир элде, кеслери да асламысында аланы ара тийрелеринде бардырылгъан эдиле. Аланы кезиуюнде жерге салыннган плитка жангыртылгъанды, чыракъла, шинтикле, урнала орнатылгъандыла, жашиллендириу жаны бла да мадар этилгенди. 

 Черекле кётюрюлюр кезиуде энергокюч бла жалчытхан объектлеге хата жетмезча аланы энчи контрольда тутаргъа керек болады. Бютюнда бек суу басаргъа эм ырхыла келирге къоркъуулу жерледе. Аны бла байламлы «Россети Северный Кавказ» - «Каббалкэнерго» компанияда энчи комиссия электрокюч ызла бузулмазча, подстанцияла эм башха объектлеге да тийишли халда ишлерча комплекс халда профилактика бардырады.

Кёп болмай «Россети Северный Кавказ» - «Каббалкэнерго»  биригиу  иелери болмай бошуна тургъан энергообъектлени къолгъа этгенди. Ол санда Элбрус бла Заюковода  0,35 Мегават ток берген эки  подстанцияны, Карагач,   Атажукино эм Заюково элледе да  4,9 километр тенгли бирде ток ызланы.  

Къабарты-Малкъарда жашагъанла  «Свет Онлайн»  мобил  приложенияны  тири  хайырланырча «Россети Северный Кавказ» - «Каббалкэнерго»  биригиу аслам эс бургъанлай турады. Аны бла байламлы  Нальчикде бёлюмлеринден биринде абонентлеге тийишли  болушлукъ тапдырады. 

Былтыр Къабарты-Малкъар къырал аграр университетде, «Строитель» эм  Эльхотов колледжледе окъугъан 87 чакълы студент «Россети Северный Кавказ» – «Каббалкэнерго» биригиуде сынамларын ёсдюрюрге онг тапхандыла. Аланы арасында  кеслерин айырмалы кёргюзталгъан тогъузаулан  электрокюч бла байламлы  бёлюмде  ишге орналгъандыла.

Россейни Правительствосу туристле къоркъуулу жолочулукълагъа чыкъгъанларыны юсюнден МЧС-ни бёлюмлерине билдириуню тынчыракъ этгенди, деп билдиредиле республиканы Курортла эм туризм министерствосундан.

Элбрус районну Тегенекли элинде къонакъ юй араны къурулушу жууукъ заманда бошаллыкъды, деп билдиредиле республиканы Курортла эм туризм министерствосундан.