Нёгерликге окъуна бет этмей

Россейни Баш прокуратурасы КъМР-ни инсанындан зорлап ахча излеген къауумну келечилерине ачылгъан уголовный ишни къабыл кёргенди. Шимал-Кавказ федерал округну тёрт инсанына Россейни УК-сыны 126-чы статьясыны 2-чи кесегини «а», «в», «г», «з» кесеклерине (адамны урлагъаны ючюн), 163-чю статьясыны 3-чю кесегини «б» пунктуна (ахча тёлерин зорлагъанлары  ючюн) терслеу материалла ачхандыла.  Къауумну эки келечиси энтта 159-чу статьяны 4-чю кесегине кёре аманлыкъ этгенлери ачыкъланнганды, деп билдиргендиле бизге надзор ведомствону пресс-службасындан.

Белгили болгъаныча, 2018 жылда апрельде ишеклиле республиканы инсанындан жерни эмда анда ишлене тургъан мекямны аланы иеликлерине ётдюрюрюн излегендиле. Аны багъасы 3,95 миллион сомгъа жетеди. Айтханларын этдирир  ючюн а  танышын жесирге алгъандыла. Нотариус битеу документлени къабыл кёргюнчю, аманлыкъчыла жесирни эркин этмей, анга зорлукъ сынатып тургъандыла.

Къауумдан экеулен 2020 жылда январьда КъМР-ден тиширыугъа машинаны сатып, 1,1 миллион сомун алгъандыла. Ала транспортха иеликни жарашдырыргъа сёз бергендиле, алай аны толтурмай, машинаны тургъан жеринден алып кетип, башха адамгъа сатхандыла.

Уголовный иш сюдню къараууна берилгенди.

Тикаланы Фатима хазырлагъанды.
Поделиться: