Жаш тёлюню Ата журтну сюерча этиуге – энчи магъана

КъМР-ни Жаш тёлюню ишлери жаны бла министерствосу 2022 жылны сентябрь айында  къуралгъанды. Ол алай кёп заман да тюйюлдю, алай ведомство иги кесек иш этерге жетишгенди. Аны башчысы Азамат Люев ведомствону баш борчуна ёсюп келген тёлю  инсанлыкъ жууаплылыгъын сезерча, Ата журтну сюерча, ниет жаны бла чыныгъырча этиуню, билим, маданият жаны бла ёсерине, хунерини  айныууна себеп болууну санайды.

Жаш тёлюню патриот ниетде юйретиуге энчи эс бурулгъанын айта, министр быллай шартла келтиргенди: озгъан заманны ичинде  сабийле эмда жаш тёлю бла  битеу билим берген учреждениялада, бийик  эмда энчи окъуу юйледе  «Донбасс-2022» сурат кёрмюч,  «Биз Кавказ ючюн жаныбызны аямай сюелгенбиз» деген  аскер-патриот фестиваль да ётгендиле.  Энчи аскер операциягъа къатышханланы  сабийлери бла  байламлы энчи  программа бардырыла турады. 2022 жылны сентябрь айындан башлап «Биз биргебиз» деген  штабны  иши тюрлендирилгенди. Энди аны баш магъаналы жумушу энчи аскер операциягъа къатышхан аскерчилеге себеплик этиу бла байламлыды.

Дагъыда  «Сабийни мектепге барыргъа хазырла» деген ат бла жандауурлукъ марафон къуралгъанды.  Аны кезиуюнде  мингден артыкъ  карандаш, къалам  жыйышдырылгъанды, аладан тёрт жюзю Херсон областьны  Скадовск районуна  жиберилгенди.  Жылны ахырында уа мингден артыкъ волонтёрну бирикдирген  республикалы форум кесини ишин бардыргъанды. Жаш тёлю министерство,  республиканы 100-жыллыгъы бла  баайламлы   ишлеге да тири къатыша, тюрлю-тюрлю   фестивальла  къурагъанды.

Жаш тёлю биригиулеге эмда  жамауат организациялагъа, бютюнда бег а мектеплеге эмда  энчи  усталыкъ  бериу  жаны бла окъуу юйлеге энчи эс бурулады, аланы башламчылыкъларына себеплик этиледи. Анга уа  грантла уллу себеплик этедиле. Алай бла, былтыр  Къабарты-Малкъардан  къыркъ эки проект  элли миллион сомдан аслам  къытханды, деп билдиргендиле бизге КъМР-ни Жаш тёлюню ишлери жаны бла министерствосундан.

Холамханланы Алима хазырлагъанды.
Поделиться: