Багъалары – учуз, хайырлары - уллу

Не десенг да, адам улуну акъылы къужурду. Аптекалада дарман не къадар багъа болса, ол къадар иги сунады. Алай учузуракъ тургъанланы хайырлары багъалыладан осал тюйюлдю. Сёз ючюн, корвалол. Аны саулукъ бла байламлы хайырланнгандан сора, юй жумушлада да жаратыргъа боллукъду. Юй бийчеле аны  бла кюйген табаланы ариулайдыла. Аны жагъып, эки-юч минутха къоюп, къаты ышысанг, адырла жангы сыфат алып къаладыла. Бир кесек дарман ийиси сакъланырыкъды, алай бир кесекден  ол да кетерикди. Уллу порошокладан эсе, ол къайда  онглуду, саулукъгъа да заран салмайды.            

Экинчиси - водородну перекисиди. Ол бетни къара тамгъачыкъладан тазаларгъа  болушады. Теригизге тырнакъ бла тиерден алгъа, анга водородну перекисин жакъмай къоймагъыз. Бу мадар бла аны ууланмаудан да сакъларыкъсыз. Дагъыда анда  къара тамгъачыкъла эм башха затла, басханыгъызлай, тамырлары бла чыгъып келликдиле.     Аны дезодорантны орунуна  да хайырланыргъа  боллукъду.

Бетни териси терк жылтырап къала эсе, ол кемчиликни да  перекисьни болушлугъу бла кетерир амал барды. Аны тоникча хайырланыргъа боллукъду.  Териге ол бир тюрлю хата салмайды.

Календуладан  жарашдырылгъан дарман суу а жараны сау этиуде кенг хайырланылады. Нек дегенде ол терини тартдырады. Ол ууланса да, аны аурутханын  сел этеди. Андан сора да,  башны терисин жаулу болмаудан сакълайды. Чач тюшмез ючюн хайырланыргъа сюйгенле уа анга кастор жау  къошаргъа боллукъдула.

«Левомеколь» мазь да жаралагъа бек жарайды. Аны  кьыйнагъан жеринге бек къалын  жагъаргъа керекди.

Холамханланы Алима.
Поделиться: