Иги кесек пособие тохташдырылгъанды

2023 жылны аллындан башлап Россейни Социал фондуну республикада бёлюмю 78 мингден аслам сабийни ата-анасына бир пособияны тёлегенди, аны ючюн 4,5 миллиард сом бёлюннгенди эм баладан ауурлулукълары болгъан 3769 тиширыугъа пособиялагъа 250 миллион берилгенди. 

Пособияны бу тюрлюсюн фонд социал казначейство халда тохташдырады. Аны алыр ючюн къырал жумушланы порталында заявление жазаргъа керекди, къалгъан данныйле ведомствола аралы байламлыкъны чегинде табыладыла эм тинтиледиле. 

Бу тёлеуню ёлчеми юйюрню файдасына кёре тергеледи:

- ол регионда сабийге жашау этерге керекли ахчаны эм аз ёлчемини 50 проценти тенгли болургъа боллукъду;

- юйюрню орта эсеп бла файдасы жашау этерге керекли ахчаны эм аз ёлчемине жетмей эсе, ол сабийге жашау этерге керекли ахчаны эм аз ёлчемини 75 проценти тенгли боллукъду;

- аны 75 процентин тёлегенде да юйюрню файдасы жашау этерге керекли ахчаны эм аз ёлчемине жетмей эсе, ол сабийге жашау этерге керекли ахчаны эм аз ёлчемини 100 проценти тенгли болады.

Эсигизге салайыкъ: бу пособие къолайлары аз юйюрлеге эндиге дери этилген болушлукъну талай тюрлюсюню – 3 жыллары толмагъан биринчи эм ючюнчю сабийге эки айгъа берилген тёлеуле, 3-8-жыллыкъ эм 8-17-жыллыкъ сабийлеге ай сайын берилген тёлеуле, баладан ауурлулукълары болгъан тиширыулагъа ай сайын берилген пособие -  орунуна тохташдырылгъанды. Айтылгъан пособияланы адамла аланы болжаллары бошалгъынчыгъа дери аллыкъдыла, артда жангысына кёчерикдиле. Бу жумушну аланы болжаллары тауусулгъунчугъа дери тамамларгъа да эркинлик бериледи.

Пособияны тохташдыргъанда юйюрню битеу келечилерини озгъан жылны ичинде файдалары тергеледи, ол да заявление жазылгъан айдан башлап угъай, андан бир ай алгъа. Файдадан сора, юйюрню мюлкюне, ата бла ана ишлегенлерине бла къалгъанларына, бир жерде урунмай эселе, аны сылтауларына да къаралырыкъды.  Дагъыда ата-ана, сабийле барысы да Россейни гражданлары болургъа эм дайым да къыралыбызда жашаргъа тийишлидиле.

Соруула бла фондну регионда бёлюмюню контакт-арасына 8 800 200 06 70  сёлеширге боллукъду.

Кульчаланы Зульфия.