Усталыгъы, адамлыгъы бла да ыспас табады

Редакциягъа окъуучуларыбыздан жарсыуларын, къууанчларын да билдирип, кёпле сёлешедиле эмда жазадыла. Ма бу жол да бир тиширыу сёлешеди да: «Мен «Заман» газетни кёп жылланы ичинде алып турама. Аны бетлеринде бютюнда Османланы Хыйсаны, Мусукаланы Сакинатны , Текуланы Хауаны, Байсыланы Марзиятны, Таппасханланы Аминатны, Тикаланы Фатиматны жазгъанларын сюйюп окъуйма», - дейди. Сора газетде алгъын ишлеген адамланы да уллу хурмет бла эсгергенди, аны къой - бир-бирлерини жазгъанларын эсде тутуп, хапар айтханды. Сёз ючюн, Къулбайланы Алийни (жаннетли болсун), Теммоланы Мухадинни уллу хурмет бла эсгергенди.

Андан сора не жумуш бла сёлешгенине кёчгенди. «Газетни эрттеден окъугъанлыгъыма, сёлешген а биринчи кере этеме. Сизден бир тилеригим барды. Бизни врач жашларыбыздан бирини - Ёзденланы Юсюпню жашы Мухадинни - юсюнден жазсагъыз, бек ыразы этерик эдигиз. Алгъаракълада больницада кесиме бакъдырып чыкъгъанма. Мухадин манга алай иги къарагъанды! Анга асыры ыразы болгъандан, назму окъуна жазгъанма. Аны да басмаларыгъызны тилейме. Къарап тургъанма да, хар саусузгъа энчи сёзле таба билгенине сейирсиннгенме. Сора къаллай байлыкъды миллетибизде Ёзден улуча адамларыбыз болгъанлары деп, кёлюм кётюрюлгенлей тургъанды»,- деп бошагъанды ол тиширыу сёзюн.

Мен Ёзденланы Мухадинни эрттеден таныйма. Керти окъуна, аны кёпле махтагъанларын, анга ыразы болгъанларын да эшите-эшите турама. Ол ишин уста билген, сыйы-намысы бийик жюрюген врачды,огъурлу адамды. Къабарты-Малкъарда угъай, башха жерледе да аны иги таныйдыла. Аны себепли кеслерине бакъдырыргъа тышындан да кёпле келедиле. Мухадин кишиге уллу кёллюлюк этмейди, къолундан келгенни аямайды, сёзю бла окъуна багъады деп, кёпле айтадыла.

Мухадин 1955 жылда Къазахстанны Джамбул областыны Красногорка элинде туугъанды. Таулу халкъ кёчгюнчюлюкден артха къайтханда, Ёзденланы Юсюп да юйюрю бла кесини туугъан элинде – Кёнделенде - орналгъанды. Мухадин школну мында айырмалы бошагъанды. Къабарты-Малкъар къырал университетни медицина бёлюмюне кирип, анда да  иги окъугъанды. Бюгюн да медицина факультетде Мухадинни аты махтау бла айтылады.

Ол врач-невролог усталыкъны сайлагъанды. Къыралны айтхылы клиникаларында ишлегенди, кесини билимин, усталыгъын да дайым ёсдюргенди. Хар затны да билеме деп къойгъанладан тюйюлдю, бюгюн да жангы амалланы билгенлей турады. Анга «Саулукъ сакълауну отличниги», «КъМР-ни сыйлы врачы», «Бийик усталыгъы болгъан врач» деген махтаулу атла бошдан берилмегендиле.

Аны аллына келген хар адамны аурууун терен сюзюп, аланы хар бирине тюз да ахлусунача ариу айта, алай багъады ол саусузлагъа.

Мухадинни атасы бла анасы да сабийлерин кертичиликге, огъурлулукъгъа, тюз ниетлиликге табынырларын излегендиле, аны да кёргендиле туугъан-туудукъларыны юслеринде. Бюгюнлюкде Мухадин кеси да насыплы атады эм аппады. Беш туудугъу барды. Бир жашы Ёзденланы Роман белгили футболистди. Аны танымагъан арабызда адам болмаз. Футболдан ангылауу болмагъан да, ол ойнаса, таулу жашды деп, эс бурмай къоймайды. Роман кёп жерледе кесини атын белгили этгенди. Бютюнда жаш футболистле анга ушаргъа итинедиле.

Экинчи жашы Эльдар атасыны ызы бла барып, медицина факультетни бошап, Москвада невролог болуп бет жарыкълы ишлейди. Жашла аталарыны башын бийикге кётюртедиле, сау болсунла. 

Огъурлу аппа туудукъларын да, жашларынча, сыйгъа-намысха юйрете, тёгерегине жыяргъа сюеди. Аны юйю къонакъсыз болмайды, ол анасыны къатында олтуруп, эртте заманланы эсге тюшюре, ушакъ этерге бек сюеди. Эгечлери эмда къарындашлары, аладан туугъанла бла да терк-терк тюбешеди. Ол а адамны жюрек тазалыгъын, тюз ниетлилигин, жууукъ кёллюлюгюн ачыкълагъан шартды.

ЁЗДЕН УЛУ МУХАДИН

Жашайды тукъум анда –
Уллу Бахсан тарында.
Ёзден бутакъ жайылып,
Башлагъанды танылып.
 
Юсюпге туугъанда жаш,
Салыннганды тыпыр таш.
Анга Мухадин аталып,
Жууукъ-ахлу да къууанып.
 
Тукъум къарты алгъыш этди,
Алгъыш Мухадиннге жетди.
Болду окъууда билимли,
Аш къангада да тигимли.
 
Таныгъанла къууанырла,
Танымагъанла танырла,
Аллах этди таныулу
Адамлагъа жараулу.
 
Доктор усталыкъ сайлап,
Билимин жаннга байлап,
Болду белгили халкъда,
Сыйлы да - тукъумунда.
 
Кётюрюлдю тюз таулай,
Тукъум къууанды саулай.
Кёпню кёзге къаратды,
Халкъгъа кесин танытды.
 
Кёп саусузгъа къарады,
Кёп адамгъа жарады,
Андан сыйлыды аты,
Ишинде – уста, къаты.
 
Ишлеп ишден тоймайды,
Болушлукъсуз къоймайды.
Амалсызгъа билекди,
Ауругъаннга керекди.
 
Жарыкъ тийсин санга кюн,
Узакъ болсун ёмюрюнг!
Минги таулай, жет кёкге –
Жарап тураса кёпге!
 
Байла кибик, монглу бол
Бийле кибик сыйлы бол
Атланнганда алгъа бол
Бир Аллаха ийнакъ бол.