Аллергиягъа бакъгъан ара жангы амалланы хайырланады

Кёп болмай Регионнга оноу этиу арада КъМР-ни Саулукъ сакълау министерствосуну штатда болмагъан баш  специалисти – аллерголог-иммунолог, медицина илмуланы доктору, профессор Аллергиягъа бакъгъан араны баш врачы   Мадина Шогенова бла тюзюнлей эфир  болгъанды. Ол медицина учрежденияны ишини юсюнден хапарлагъанды эм тынгылаучуланы  да аллергия,  иммуналогия бла байламлы сорууларына  жууап  бергенди.  

Мадина Суфьяновна,  тюрлю-тюрлю аллергия ауруулагъа диагностика, багъыу эм профилактика бардырыуну юсюнден  билдиргенди. Ол айтханнга кёре,  саулай Шимал Кавказ федерал округда Нальчикден сора аллергия эм  иммунология жаны бла  ара жокъду.  Ол себепден анга  профильли аурууу бла ким болсада келирге, кесине бакъдырыргъа эркинди.

Бусагъатда стационарда диагностика бардырыуда кёп тюрлю, ол санда жангы амалланы хайырланадыла.  Аны бла бирге аллергиялары къыйнагъанла медицина  полислери бла   кюз артында бла къышда тестлени ётерге боллукъдула. Аллай амал саусузгъа жарарыкъ   дарманны айырыргъа да болушурукъду. 

​Аллергиягъа къажау турууну юсюнден айтханда,  къонакъ  эм биринчи медикаментоз фармакотерапия амалны,  адамны санындан уун кетируню, аллергияны къозгъагъан шартдан кенг турууну    сагъыннганды.  Аны бла бирге хауада битимлени букъулары азыракъ чачылырча  къыралны болушлугъу бла  административ халда мадар да этилирге жарагъанын эсгертгенди. 

​Врач Элбрус элде орналгъан бёлюмлерини ишини юсюнден да айтханды. Эм биринчиден стационарда   уллу, гитче да багъылгъанларындан сора реабилитацияны ётгенлерин   къошханды.  Андан  сора да, жууууукъ заманда  арада 16,5 миллион сом багъасына алыннган  жангы медицина обрудование ишлеп башларыгъын да сагъыннганды. 

Диагностикада, багъыуда эм профилактикада жангы амалланы хайырланыуну юсюнден айтханда, бийик класслы сынамлы препаратланы себеплиги бла  эм къыйын  бронха астманы   атопиялы дерматитни (кёбюсюнде ол  сабийледе тюбейди) багъаргъа  жарагъанын белгилегенди. Ал заманлада аллай ауруулагъа  бир тюрлю медицина болушлукъ этерча болмагъан эсе да, энди  сабий  алты жылындан башлап контрольгъа алынады.  

​- Битимле чакъгъан заманда  букъуларына аллергиялары къозгъанлагъа экинчи сезоннга дери тёзмей, кеслерине къаратырларын тилейме. Кюз артында (ноябрьде)  бизге келип  аллергияларын  тинтирча иммунотерапияны ётерлерин эслерине салыргъа сюеме,- дейди специалист. 

Тюзюнлей бериуню кезиуюнде Мадина Шогенова тынгылаучула берген соруулагъа да тынгылы жууапла тапдыргъанды. Аланы асламысы  астма, тюрлю-тюрлю аллергия ауруула, багъылыргъа жарагъан дарманла  бла байламлы болгъандыла.