Суратлада ветеранланы жарыкъ сыфатлары

КъМР-ни Суратлау искусстволарыны А.Л. Ткаченко атлы музейинде 2023 жылда 8 майдан башлап 15 майгъа дери, «Юйюр альбом» социал проектни чегинде, аллай аты бла фотоаппарат бла алыннган суратланы кёрмючю бардырылады. Ол кеси да фронтчулагъа – Уллу Ата журт урушну ветеранларына жораланады. «Юйюр альбом» социальный проект Уллу Ата журт урушну юсюнден эсгериулени сакълаугъа эмда тёлюлени араларында байламлыкъланы кючлеуге бурулупду.

«Бек биринчиден проектибиз бла Уллу Ата журт урушну ветеранларына эс бурууну излейбиз. Нальчик шахарда аладан бюгюнлюкде жаланда онбир адам жашап турадыла. Организациябыз быллай къыйын заманда кеслерини ыразылыкъларын берген беш ветеран эмда аланы юйюрлери бла профессионал фотосессия бардыргъанды. Бизни оюмубузгъа кёре, аланы сабийлери, туудукълары, учхунлары бла бирге болгъан кезиулени профессионал суратлагъа алдырыу эмда сакълау бек магъаналыды. Фотосессияланы эсеплери омакъ «Юйюр альбомгъа» жыйыллыкъдыла, анда жангы суратладан сора да, оцифровка этилген эскилени, фронтдан письмоланы, саугъаланы эм башха къыйматлы аберилени кёрюрге боллукъду. Бу фотоальбом багъалы саугъа боллукъду эмда, сёзсюз, бюгюннгю, келлик тёлюлеге да тарыхны сакълагъан магъаналы юйюр документ да. Проектни биринчи урумунда 2021 жылда этилген битеу ветеранланы суратларыны жыйымдыгъан эмда анга къошулгъан жангы суратлары болгъанны да Нальчик шахар округну Ветеран советине, шахаргъа эсде къаллыкъ саугъача, беребиз», - деп белгилегенди проектни автору Ульяна Красильникова.

Проект КъМР-ни Маданият министерствосуну, КъМР-ни Жарыкъландырыу эм илму министерствосуну, КъМР-ни Жаш тёлю министерствосуну, «Единая Россия» партияны регион толтуруучу комитетини, «Биринчилени къымылдаулары» РДДМ-ни, Нальчик шахарны ветеран советини, Суратлау искусстволаны музейини болушлукълары бла бардырылады. «Юйюр альбом» социальный проектге къурау жаны бла себепликни Нальчик шахарда Урушну, урунууну, Сауутланнган кючлени эмда право низамны сакълаучу органланы ветеранларыны жамауат организациясы этгенди. Проект Росмолодёжь. Гранты эришиуню билеклиги бла жашаугъа кийириледи. Кёрмюч, огъарыда белгилегенибизча, 15 майгъа дери боллукъду.