Кавказны къоруулагъанланы эсгере

Бизни къыралда эм бийикде орналгъан подстанцияны къатында Россети компанияны Къабарты-Малкъарда бёлюмюню – «Каббалкэнергону» келечилери жыйылып, Уллу Ата журт урушну кезиуюнде Кавказны къорууларгъа сюелген адамларыбызны жигитликлерин эсгерип, назмула окъугъандыла. Энергетикле бу жумушха къатышыргъа Красноярск крайдан келген къонакъланы да чакъыргъандыла.

Минги тауну этеклеринде орналгъан, кеси да ол тийрени ток бла жалчытхан подстанция «Минги тауну Жигитлери» деген даражалы атны жюрютгенли юч жыл болады. Аны бла «Россети Шимал Кавказ» компания Кавказны къоруулай жанларын берген аскерчилерибизни атларын ёмюрледе къалырча этерге сюйгенди.

1942 жылда жайда эмда кюз айлада Минги тауну этеклеринде Совет аскерчиле Вермахтны кючлери бла сермеш бардыргъандыла. Бизни солдатларыбыз кеслерини жашауларын салып, аскер оноучуларыбызгъа душманланы къырырча адамла жыйып жиберирге заман бергендиле. Аны бла Грозныйде эмда Бакуда нефть чыкъгъан жерлеге термилген фашистлени жолларын кесгендиле, Кавказда миллетлени да зулмучуладан къутхаргъандыла.

Жигитлерибизни ёлюклерин буз къысып, аланы жерге салыргъа онг болмай тургъанлы жарым ёмюр озгъан болур эди. «Бу ёмюрню аллында уа, чыранла эрип башлагъанлары себепли, 250 аскерчини «асыраргъа» онг табылгъанды. Аланы къабырлары Терс-Къолда, сагъынылгъан подстанцияны къатындады», - дегенди Элбрус районда электрокюч сетьлени урунууну къоруулау жаны бла специалисти Оксана Солдатенко.

Бу подстанция озгъан ёмюрню жетмишинчи жылларында ишленнгенди. 2005 жылда 2 мартда уа къая башында жыйылгъан къар тюшюп, анда эки трансформаторну ууатханды. Аны хатасындан эки ток ыз юзюлгенди, Терс-Къол бла Байдаланы эли, «Азау» бла «Эски Кругозор» станцияланы арасында канат жол да токсуз къалгъандыла. Андан сора бу объектни башха жерге кёчюргендиле. Шёндю ол юч элни, къыркъ чакълы къонакъ юйню, социал учрежденияланы, канат жолланы эмда туризм инфраструктураны электрокюч бла жалчытады.

 

Улбашланы Мурат хазырлагъанды.
Поделиться: