Агъачда ажашмазча не этерге керекди?

Республикабызны табийгъатыны эм ариу жерлеринден бири агъачларыдыла. Жаз башы-жай келгени бла уа алагъа жолоучулукълагъа чыкъгъанланы  саны ёседи. Алай жерни танымагъан адамгъа агъачха барыргъа къоркъуулуду. Аны теренинде ажашмазча МЧС-ни регионда бёлюмю талай эсгертиу этгенди:

- наныкъла, бир башха битимле жыяргъа неда солургъа сюйюп агъачха баргъанда къайсы жолла бла ётеригизни, къайтыр заманыгъызны юсюнден жууукъларыгъызгъа айтыгъыз;

- биргегизге сызгъырырча зат эм телефонугъузгъа заряд батарея алыргъа унутмагъыз;

- хуржунугъузгъа компас, сирнекле, бичакъ, бир кесек суу бла азыкъ салыгъыз;

- жарыкъ тюрсюнлю кийимле кийигиз, комуфляжда юч метрден окъуна эсленмезге боллукъсуз;

- жолугъузда тюбеген сейир халда ёсген терекле, къаяла, ташла дегенча  не къадар кёп затны эсде тутаргъа кюрешигиз;

Алай болгъанлыкъгъа ажашха эсегиз а, адыргы этмегиз, эс жыйып, къайсы жанындан келгенигизни эсге тюшюрюрге кюрешигиз, бир жерден адам тауушла, ит юрген неда машина баргъан тауушла эшитиле эселе деп тынгылагъыз. Онг бар эсе, бийик терекге ёрлеп, тёгерекге къарагъыз. Сизни излериклерин биле эсегиз, жеригизде туругъуз, от тиргизигиз, тютюнню болушлугъу бла ажашханны тапхан тынч болады. Артха жолну кесигиз табаргъа сюе эсегиз, тёгерек айланып турмаз ючюн, кюнню къайдагъысына къарай туругъуз, былайда терекледе бичакъ бла белгиле къоя барсагъыз да, болушурукъду. Электроызлагъа, темир жолгъа, газ быргъылагъа неда суугъа чыкъгъан эсегиз, аланы къатлары бла барыгъыз, къалай-алай болса да, адамлагъа келликсиз. Кече жолда жетген эсе, табыракъ жерни излегиз. Къарангыда танымагъан агъачлы жерде барыргъа керек тюйюлдю, ачыргъа, саулугъугъузгъа чып тюшюрюрге боллукъсуз. От тиргизирча чыбыкъла жыйыгъыз, аркъагъызны терекге таяндырып олтуругъуз, отну аллыгъызда жандырыгъыз, кече узуну ол ёчюлмезине къарай туругъуз. Сора, ажашханланы табыуда сотовый телефон кёп кере себеплик этгенди, ол ишлей эсе, «101» номерге сёлешигиз.