«Хорламны диктантына» сейир, хар замандача уллуду

«Единая Россия» быйыл бешинчи кере «Хорламны диктанты» халкъла аралы патриот акцияны бардыргъанды.  Аны къыралны битеу субъектлеринде бла 46  тыш къыралда 22 минг жерде жазгъандыла. «Хорламны диктантыны» арасы Москвада Хорламны музейинде къуралгъанды. Аны бла  Кингисчепде, Парижде, Волгоградда эмда  Эльбрусда къуралгъан жерле телемост амал бла байланнгандыла.

  «Хорламны диктанты» гитлерчилеге къажау урушда жанларын бергенлеге, Хорламны келтиргенлеге хурмет этилгенин кёргюзтюуню энтта бир мадарыды, деп белгилегенди Россейли тарых обществону башчысы    Сергей Нарышкин, акцияны ача.  

- Хорламны тёлюсюню, бизни аталарыбызны, аппаларыбызны жигитлиги Ата журтубузгъа сюймекликни багъасын кёргюзтгенди. Ала душманнга жалынмазгъа, андан къачмазгъа, келир тёлюлени аллында жууаплылыкъны сезерге юйретедиле,-дегенди Сергей Нарышкин эмда Уллу Ата журт урушну ветеранларына битеу жамауат баш ургъанын айтханды. 

Партияны генсоветини секретары   Андрей Турчак   Кингисепп бла телемостну кезиуюнде  «Хорламны диктанты» Уллу Ата журт урушну тарыхын билген бла бирге  аскерчилени жигитликлерини, тылда Хорлам ючюн уруннганланы жигерликлерини, къазауатдан сора къыралны мюлкюн аягъы юсюне этгенлени  иш кёллюлюклерини белгисине айланнганын чертгенди.

  Андрей Турчак айтханыча, акциягъа биринчи кере Донецк эм Луганск халкъ  республикала, Херсон эм Запорожье  областьла къатышхандыла. Алада 300 жерде жазгъандыла  диктантны. 

Партияны «Тарых эсде тутуу» проектин жашауда бардырыугъа жууаплы  Александр Хинштейн жылдан-жылгъа бу тарых магъаналы ишге къатышыргъа сюйгенлени саны ёсгенлей баргъанын чертгенди.  Быйыл аны   «Патриот» паркда, «Орлёнок» сабий солуу арада,   Дербентде Нарын-къалада, аламда Халкъла аралы станцияда жазгъандыла.   «Ямал» авиакомпанияны самолётунда учуп келгенле уа 10 минг метр бийикликде къошулгъандыла диктантха.

Акциягъа онлайн халда диктантпобеды.рф  сайтда къатышыргъа онг болгъанды. 45 минутну ичинде 25 соруугъа жууапла берирге керек эди. Аладан 20-сы аскер-тарих тема бла байламлыдыла. Энтта 5-чи уа – регионну жашаууну юсюндендиле. Быйыл диктантха Нюрнбергде сюдню, Сталинград, Курск сермешлени, Донбассны душмандан эркин этиуню, Ленинград  къуршоуну  юслеринден соруула болгъандыла.

Тамата классланы окъуучулары битеу соруулагъа тюз жууапла берселе, алагъа вузгъа киргенде болушлукъ этиледи. Федерал бёлюмде хорлагъанла уа 9 майда Къызыл майданда парадха къараргъа  чакъырыллыкъдыла.

 Къабарты-Малкъарда диктант 76 жерде бардырылгъанды. Аны 6 мингнге жууукъ адам жазгъанды, деп билдиргендиле  KABARDIN-BALKAR.ER.RU сайтда.

  - Бу акциягъа жамауатда сейир уллуду. Мен кесим да диктантны бешинчи кере жазама. Парламентни депутатлары республиканы жаш тёлюсюне Ата журтубузну тарыхын билирге, халкъны жигитлигине баш урургъа кереклисини юлгюсюн кёргюзтебиз. «Хорламны диктанты» тарыхны сакълау, аны тёлюден тёлюге тюз билдириу ишде артыкъда магъаналыды,-деп чертгенди «Единая Россияны» КъМР-де регион бёлюмюню секретарыны орунбасары, КъМР-ни Парламнетини спикерини экинчиси Жанатайланы Салим.

Аскер махтаулукъну шахары Нальчикде диктантха къатышханланы саны бютюнда Къабарты-Малкъар къырал аграр университетде, Искусстволаны Шимал-Кавказ къырал институтунда  кёп болгъандыла. Аны Европаны эм бийик тёппеси Элбрусда да жазгъандыла.