Эски неда бузулгъан ток счётчиклени алышындырыргъа унутмагъыз

  «Каббалкэнерго» предприятиядан билдиредиле: электрокючню эсеплеучю приборну хайырланыргъа жараулу болжалы чыкъгъан эсе, ол эски тюрлюлеринден (1992 жылгъа дери этилген) бири эсе неда ишлемей эсе – аны мычымай алышындырыргъа керексиз. Ахыр экиси не халда болгъанларын билген къыйын тюйюлдю, биринчини уа заманы къачан жетериги квитанцияны огъары мюйюшюнде лицевой счётну тюбюнде жазылады.
  Счётчик бузулуп болса, электрикле ол кёргюзтгенни эсге алмайдыла. Приборну, башында айтханыбызча, хайырланыргъа жараулу болжалы чыкъса, аны ызындан келген юч айны ичинде тёлеулени ёлчеми токну орта айлыкъ хайырланыууна кёре тергелликдиле. Андан ары уа - нормативлеге кёре, кеси да кёбейтиу коэффициент бла.
  Приборну тинтирге неда алышындырыргъа оноу этсегиз, ары дери бир ыйыкъ алгъа «Каббалкэнергогъа» барып заявление жазып билдиригиз. Ансыз а тазир тёлерге тюшерикди.
  РФ-ни Правительствосуну 2012 жылда 12-чи майда 442 номерли бегими бла, ток счётчикни заманында алышындырыу - юйню иесини борчуна саналады. Ол себепден уллу кёллю болмагъыз. Дагъыда бир тюрлю ангылашынмагъан зат болмаз ючюн, эм азы бла жылгъа бир кере приборну кёргюзтгенин компаниягъа барып, анда электрон базада болгъан тарихле бла тенглешдиригиз. Кезиулю тёлеулени уа болжалына салмай, борч да этмей заманында берирге кюрешигиз.