Баш проблема – жаш эм бийик билимли кадрланы жетишмегени

Къабарты-Малкъарны Жамауат палатасыны жыйылыууна толтуруучу власть органланы, маданият учрежденияланы келечилери, устазла къатышхандыла, ала республикада культура жаны бла специалистле жетишмейдиле деген оюмгъа келгендиле.

Бюгюнлюкде регионда 2025 жылгъа дери «Къабарты-Малкъарда маданият» деген программа ишлейди, аны «Искусство» подпрограммасы художестволу билим бериуге, культура кадрланы хазырлаугъа жораланыпды. Программада белгиленнген борчланы тамамлауну чегинде сферагъа жаш специалистле келирча, кадрланы усталыкъларын ёсдюрюрча мадарла этерге белгиленеди.

Битеу Россейдеча, Къабарты-Малкъарда да культура эм искусство билим бериу юч бёлюмден къуралады: искусстволаны сабий школу – колледж – вуз. Республикада искусстволаны сабий школлары 28 боладыла, аладан 17-си шахарлада, 11-ри да элледе орналыпдыла. Маданият учрежденияла уа 398-ле. Культура министерствону ведомстволу учрежденияларында 1007 специалист ишлейдиле, муниципал маданият организациялада – 1381, аладан бийик билимлери 25,7 процентини барды, ол а кадрла жетишмегенлерине шагъатлыкъ этеди.

Муниципалитетледе ишлеген кадрланы 48 процентини жыл санлары 30-50 дериди, 30 жыллары толмагъанла жангызда 10 процент боладыла,55 жылдан таматала уа – 42 процентдиле. Жыйылгъанла оюм этгенден, бу болум маданият ишчини усталыгъыны жамауатда даражасы бийик болмагъаны эм иш хакъны азлыгъы бла байламлыды. Палатаны культураны айнытыу, тин хазнаны сакълау эм асламлы информация органла жаны бла комиссиясыны башчысы Атмырзаланы Магомет былайда къыралны жанындан себепликни магъанасы уллу болгъанын чертгенди. «Кадрла жаны бла проблеманы тамамлар ючюн, законодательствону игилендирирге, хайырлы контрактланы кийирирге, жалчытылынган жумушланы качестволарын дайым тинтирге, бийик билимли специалистлени санын кёбейтирге эм аланы квалификацияларын ёсдюрюрге тийишлиди», - дегенди ол.

Жыйылыуну эсеплерине кёре, битеу сейирлери болгъан органлагъа эсгертиуле жиберилгендиле, деп билдиредиле Жамауат палатаны пресс-службасындан.

Кульчаланы Зульфия.