Жангы жорукъла ишлеп башлагъандыла

Быйыл 1 январьдан, инсан болжаллы халда саулугъун тас этип, ишге чыкъмагъаны ючюн этилген  тёлеулени ёлчеми ёсгенди. Энди адам ауругъан кюнден эки жыл алгъа тюшген файдасына кёре саналлыкъды больничный. Тёлеуню ёлчеми страховой стажгъа кёре боллукъду, деп ангылатханды бизге КъМР-ни прокуратурасында федерал законланы толтуруугъа надзор жаны бла бёлюмню тамата прокурору Ирина Маденова.

- Быйыл больничныйни эм уллу ёлчеми 83,2 минг  сомгъа жетерикди, страховой стаж сегиз эм андан кёп жылгъа жете эсе. Башхача айтханда, айлыкъ толусунлай тёленеди. Страховой стаж беш жылдан сегиз жылгъа дери жетген кезиуде уа пособие 66,5 минг сомдан аслам боллукъду – орталыкъ айлыкъны 80 проценти. Стаж беш жылдан аз эсе уа, больничный  49,9 минг сом боллукъду – айлыкъны 60 проценти,-дегенди Ирина Маденова.

    Тенглешдирип айтханда, былтыр бу къырал себепликни эм уллу ёлчеми 78,2 минг сомгъа жетгенди. Быйыл энтта бир жангы жорукъ кийирилгенди. Энди бу тёлеулени, организацияда ишлемей, жумушланы келишим этип толтургъан кезиуде  алыргъа да боллукъду. Жаланда инсан озгъан жылда айлыкъны эм аз ёлчемини тенгли страховой тёлеуле этген эсе алыргъа боллукъду аны (былтыр – 4833 сом). Бизни ушакъ нёгерибизни айтханына  кёре, Россейни Социальный фонду инсаннга болжаллы халда ауругъаны ючюн тёлеулени электрон больничныйге кёре тергейди.

- Жумушланы толтурууну юсюнден келишимле бир ненча организация бла къабыл кёрюлген эселе, больничный жаланда бирини шартларына кёре тёленирикди. Компанияны  инсан кеси сайларыкъды,-дейди Ирина Маденова.